Aqmola oblysynda ákesi men balasyn mert qylǵan kólik júrgizýshi sottaldy
Aqmola oblystyq PD baspasóz qyzmetiniń málimetinshe, jol apaty 2022 jyldyń 23 tamyzynda saǵat 22:00 shamasynda «Ekaterınbor-Almaty» tasjolynda bolǵan.
«Anyqtalǵandaı, Qaramendi batyr aýyly jaǵynan Tselınograd aýdany Tasty aýyly baǵytynda júrip bara jatqan «Audi A6» avtokóliginiń júrgizýshisi masań kúıde jyldamdyqqa qatysty jol qozǵalysy erejesiniń birneshe tarmaǵyn buzǵan. Sonyń saldarynan onyń kóligi alda ketip bara jatqan «Mazda 626» kóligimen soqtyǵysty. Artynsha, «Mazda 626» kóligi joldyń qarsy baǵytyna shyǵyp ketip, tirkemesi bar «Mersedes Benz» júk kóligine betpe-bet soǵyldy. Qatty soqqydan jeńil kólik ekige bólinip, keıinnen órtke orandy. Oqıǵa ornynda «Mazda 626» avtokóliginiń júrgizýshisi tilge kelmeı kóz jumdy, al onyń janynda otyrǵan 17 jasar uly aýrýhanada qaıtys boldy», - dedi vedomstvodan.
Osyǵan baılanysty Qylmystyq kodekstiń 345-1-baby boıynsha «kólik quraldaryn alkogoldik, esirtkilik jáne (nemese) tosıkomanıkalyq masań kúıde basqaratyn adamdardyń jol qozǵalysy erejesin buzýy» boıynsha qylmystyq is qozǵady.
«Sottalýshy jol apatyndaǵy kinásin tolyq moıyndady. Aıtýynsha, áıeli ekeýi arasynda bolǵan janjaldan keıin araq iship, rýlge otyrǵan. Jol-kólik oqıǵasy kezindegi sáti esinde joq, tek bolǵan oqıǵaǵa tolyq ókinedi», - dep tolyqtyrdy vedomstvodan.
Aqmola oblysy Tselınograd aýdandyq sotynyń úkimimen «Audi A6» avtokóliginiń júrgizýshisi kináli dep tanyldy. Ol ómir boıyna kólik júrgizý quqynan aıyrylyp, bes jylǵa sottaldy.
Aıta ketsek, Aqmola oblysynda júk kóligin toqtatpaqshy bolǵan mehanık kóz jumdy.
