Aqmola oblysynda Aqan seriniń 175 jyldyǵy etno-kúnmen atap ótildi
ASTANA. QazAqparat - Aqmola oblysynda Aqan seriniń 175 jyldyǵyna arnalǵan «Máńgilik áýeni» atty etno-kún ótti, dep habarlaıdy QazAqparat óńirdiń Іshki saıasat basqarmasyna silteme jasap.
«Bastapqyda Aqan seriniń mereıtoıyn murajaıda ótkizýdi josparladyq. Keıin is-sharany aýqymy keńeıe tústi. 2013 jyly Aqan seriniń ǵashyǵy Aqtotynyń artynan ergen urpaqtary murajaıǵa biraz áshekeı buıymdar ótkizgen bolatyn. Bul jádigerler Aqan seri ekspozıtsııasyn tolyqtyra tústi»,-deıdi Aqmola oblystyq tarıhı-ólketaný murajaıynyń ǵylymı qyzmetkeri Kúmis Qasymbaeva.
Shara Aqan seri atyndaǵy aýylǵa barýdan bastaldy. Aqmola jáne Soltústik Qazaqstan oblystarynyń ǵalymdary, zertteýshileri men qoǵam qaıratkerleri aqyn rýhyna taǵzym etip, onyń shyǵarmashylyǵyn zertteýdegi tájirıbelerimen jáne derekterimen bólisti.
Etno-kúnniń eń qyzyqty oqıǵalarynyń biri sharaǵa Aqtotydan taraǵan urpaqtyń biri - Orynbasar Tókenovanyń qatysýy boldy. Ol Aqan seri men óz apasynyń arasyndaǵy mahabbatty áńgimelep berdi. Olardyń sezimderiniń sımvoly bolǵan - Aqan seriniń Aqtotyǵa syılaǵan saqınasy qazir oblystyq murajaıda saqtaýly.
Іs-sharanyń kelesi bólimi Sh.Qusaıynov atyndaǵy qazaq mýzykalyq drama-teatrynda jalǵasty. Munda «Aqan seriniń adalbaqany» fılmi men Ǵabıt Músirepov 1941 jyly jazyp ketken «Aqan seri-Aqtoty» spektakli sahnalandy.
M. Jumabaev atyndaǵy oblystyq kitaphanada aqynnyń shyǵarmashylyǵynan syr shertetin kitap kórmesi ótti. Óner jáne ádebıet murajaıy Úkili Ybyraı, Aqan seri, Balýan Sholaq syndy tulǵalar ustaǵan mýzykalyq aspaptar men olardyń jeke zattarynyń kórmesin uıymdastyrdy.
Oblystyq fılarmonııa ánshileri «Balqadısha», «Qulager», «Mańmańger», «Kójendet», «Syrymbet» sııaqty týyndylardy oryndady.
Etno-kún Aqmola oblystyq tarıhı-ólketaný murajaıynda ejelgi qazaq zergerlik buıymdary men ulttyq kıimderiniń kórsetilimimen óz máresine jetti.
«Aqan seriniń boıyndaǵy serilik estetıkalyq talǵamǵa qurylǵan. Ol qylań atqa minse aqshyl, ashyq tústi kıim, baran atqa minse qońyrqaı nemese qoıý tústi kıimder kıetin bolǵan. Ol ustaǵan dúnıeniń barlyǵy kúmispen áshekeılengenin baıqaýǵa bolady»,-deıdi Kúmis Qasymbaeva.
