Aqmola oblysynda aǵashtardy zańsyz kesýdiń 8 deregi tirkeldi
Aqmola oblysynyń Polıtsııa departamenti tabıǵat qorǵaý zańnamasy salasynda turaqty negizde jedel-aldyn alý is-sharalaryn júrgizýde. Atqarylyp jatqan jumystarǵa qaramastan, aǵymdaǵy jyly quqyq buzýshylardyń zańsyz áreketteri nátıjesinde 243 tekshe metr orman kesilip, memleketke 1 mln teńgeden astam somaǵa zalal keltirildi.
15-31 jeltoqsan aralyǵynda óńir aýmaǵynda qylqan japyraqty aǵashtardyń jas óskinderin zańsyz kesýdi, daıyndaýdy, tasymaldaýdy jáne satýdy boldyrmaý maqsatynda «Shyrsha» respýblıkalyq aktsııasy ótkizilip jatyr. Osylaısha, jeke tulǵalarǵa orman qoryna kirmeıtin aǵashtar men butalardy zańsyz kesý, joıý nemese zaqymdaý 50 AEK-ke deıin, orman qoryna kiretin aǵashtar men butalardy zańsyz kesý, joıý nemese zaqymdaý 100 AEK-ke deıin aıyppul salýǵa ákep soǵady. 100 AEK-ten astam somaǵa zalal keltirilgen jaǵdaıda qylmystyq jaýapkershilikke tartylady.
Jalpy, aktsııany ótkizý kezeńinde ÁQBtK-niń 386-baby (Jasyl ekpelerdi kútip-ustaý jáne qorǵaý qaǵıdalaryn buzý) boıynsha Aqmola polıtseıleri 10 quqyq buzýshylyqty anyqtady, ÁQBtK 381-1-baby (Aǵashtar men butalardy zańsyz kesý, joıý nemese zaqymdaý) boıynsha 3 ákimshilik hattama toltyrdy. Jyl basynan beri «Shyrsha» aktsııasy aıasynda QK 340-baby (Zańsyz kesý) boıynsha 8 qylmystyq is, 188-baby (Urlyq) boıynsha bir qylmystyq is qozǵaldy.
