Aqmola oblysynda ádep kodeksiniń normalaryn buzǵan basqarma basshysy qyzmetinen ketedi
Jyl basynan beri birinshi ret ótkizilip otyrǵan Ádep keńesiniń otyrysynda kún tártibine saı joǵaryda atalǵan departamenttiń qyzmetshisi Erbaıan Súleımenovtiń oblystyq jumyspen qamtý jáne áleýmettik baǵdarlamalardy úılestirý basqarmasynda josparly ótkizilgen tekseristiń nátıjesinde anyqtalǵan olqylyqtar, zań buzýshylyqtar týraly baıandamasy tyńdaldy. Baıandama barysynda basqarmaǵa mamandardyń turaqtamaýy, qyzmetshilerdiń jumystan óz erikterimen bosatylýy jóninde aryz jazyp, basqa qyzmetterge aýysýlary jıi oryn alǵany aıtyldy. Byltyrǵy 2016 jyldyń ishinde 16 adam jumystan óz erkimen shyǵyp, tekseris júrgizý ýaqytynda 33 oryn bos turǵan. ıAǵnı, shtattaǵy 37 adamnyń 32-i túrli sebeptermen óz erikteri boıynsha basqa mekemelerge aýysyp ketipti. Basqarmada sonymen qatar, aıyppul óndirýdiń ýaqyty durys jolǵa qoıylmaǵan, tıisti qujattar talapqa saı oryndalmaǵan. Ótken jyly 3 adam qyzmet barysynda ákimshilik jaýapkershilikke tartylǵan.
Basqarma basshysy Dına Ahmetjanova tekseriste anyqtalǵan olqylyqtar men kemshilikterdiń oryn alǵandyǵymen tolyq kelisip, mekeme qujattaryndaǵy sáıkespeýshilikter burynǵy basshydan qalǵan mura ekendigin aıtyp aqtaldy. Al, ujym músheleriniń turaqtamaýy eńbekaqynyń tómendiginen bolyp otyrǵan másele ekendigin ýáj etti.
«Jastar eńbekaqysy jaqsy, turaqty jumys tapqansha atalmysh basqarmada istep, keıin ketip qalady», - dedi D.Ahmetjanova.
Bul rette, keńes músheleri basqarmaǵa jumysqa ornalasýǵa kelgen úmitkerlerdi memlekettik qyzmetke qabyldaý boıynsha áńgimelesý kezeńine shaqyrǵanda, suhbattasý barysynda olarmen jumys istep, maqsattaryn anyqtap alýlary qajettigin eskertti. Keńes músheleri basqarma basshysyna osy máseleni erekshe eskertip, jumysty tıimdi jáne tıisti deńgeıde uıymdastyrýdy tapsyrdy.
Budan ári memlekettik qyzmetke kir keltirip, tártiptik teris qylyq jasaǵan jáne Qazaqstan Respýblıkasy memlekettik qyzmetshileriniń Ádep kodeksiniń normalaryn buzǵan memlekettik qyzmetshilerdiń tártibi qaraldy. Bul oraıda, Aqmola oblysynyń tabıǵı resýrstar jáne tabıǵatty paıdalanýdy retteý basqarmasynyń basshysy Rýslan Áýbákirovtiń memleket qarjysyn maqsatsyz jumsaýy týraly másele kóterildi. Ol oryndalǵan jumystardy qabyldaý jóninde sheshim ázirleý kezinde «Nur jáne D» jaýapkershiligi shekteýli seriktestigine zańsyz, jumys tolyq oryndalmaı turyp, qomaqty kólemdegi mıllıondaǵan qarjyny erte aýdarǵan. Sonyń nátıjesinde ol atalǵan seriktestikke Qazaqstan Respýblıkasynyń zańnamasynda kózdelmegen kómek kórsetken. Keńes barysynda ol barynsha aqtalyp baqty. Prokýratýra qyzmetkerleriniń tekserisi kezinde densaýlyǵyna baılanysty eńbekke jaramsyzdyq bıýlleteninde bolǵanyn jetkizdi. Sondaı-aq, ol prokýratýra qyzmetkerleri men tıisti organdardyń basqarmada júrgizgen josparly memlekettik tekserisinen keıin shyǵarylǵan anyqtamalar onyń qolyna tımegendigin, tekserý aktisi shyǵarylǵan soń, eldi mekenderde júzege asyrylyp jatqan jobalardyń qurylysy toqtap qalǵandyǵyn aıtyp, tıisti oryndarǵa kiná taqty.
Prokýratýra qyzmetkerleriniń málimdeýinshe, ol memlekettiń qomaqty qarajatyn ýaqytynan buryn aýdaryp, tıisti qujattardy sot is qozǵalǵan kezde ǵana jasaǵan. Keńes músheleri joǵary laýazymdy memlekettik qyzmetshi Rýslan Áýbákirovtiń osyndaı kemshilikter men olqylyqtarǵa jol bergeni úshin qyzmetine tolyq saı emes dep sheshim shyǵardy.
Budan soń keńes músheleri Indýstrııalyq damý jáne ónerkásiptik qaýipsizdik komıtetiniń Aqmola oblysy boıynsha departament basshysy Qulmahan Begılovke qatysty tártiptik isti qarady. Ol Eńbekshilder aýdanyndaǵy «Semizbaı Ú» kásipornyn tekserý kezinde Qazaqstan Respýblıkasy memlekettik qyzmetshileriniń Ádep kodeksiniń talaptaryn buzypty. Josparly tekseris júrgizýge komıssııa atynan bir ózi ǵana barypty. Kásiporynnyń tynys-tirshiligin, qaýipsizdik erejelerin saqtaýy jónindegi jaǵdaılardy tekserýi kezinde jumysshylarǵa beıpil sózder aıtyp, ar-namystaryn taptaǵan. Tekseris kezinde osyndaı sózderge shydaı almaǵan bir qyzmetkerdiń qan qysymy kóterilip, qulaǵan. Otyrys kezinde ol barynsha aqtalýǵa tyrysty, arnaıy qujattardy da daıyndap ala kelipti. Degenmen, keńes músheleri aryzdanýshylar men departament basshysyn tyńdaı kele tıisti sheshim shyǵardy. Qulmahan Begılovke eskertý jarııalandy.
