Aqmola oblysynda adam toly kólikke oq jaýdyrǵan kúdiktiler qamaýǵa alyndy
KÓKShETAÝ. QazAqparat - Aqmola oblysynda «Mıtsýbısı Galant» kóliginde otyrǵan adamdardy óltirmek bolǵan 31 jáne 30 jastaǵy kúdiktiler ustaldy, dep habarlaıdy QazAqparat tilshisi.
ІІD baspasóz qyzmetiniń málimeti boıynsha keleńsiz oqıǵa qarashanyń 30-nda Jarqaıyń aýdanynyń Prıgorodnoe aýylynda oryn alǵan.
«Keshki saǵat 18:00 shamasynda «Mıtsýbısı Galant» kóligine otyrǵan jergilikti turǵyndarǵa belgisiz bireýler oq jaýdyrǵan. Osy kezde, úsh adam kólik salonynda otyrǵan. Bulardyń qasynda bolǵan taǵy ekeý qashyp úlgergen. Olardyń artynan da oq atylǵan. Osynyń saldarynan 1977 jáne 1982 jylǵy eki adam zardap shegedi. Al, kúdiktiler qashyp, oqıǵa ornynan izin sýytady.
Oqıǵa ornyna jedel tergeý toby jetip, «Mıtsýbısı Galant» kóligin tekserip, myltyq oǵynyń gılzalary men izderin anyqtaıdy. Keıin ІІD Uıymdasqan qylmyspen kúres boıynsha basqarmasynyń qyzmetkerleri kúdiktilerdiń Astana qalasynda jasyrynyp júrgenin anyqtaıdy. Nátıjesinde kúdiktilerdiń biri Talapker aýylyndaǵy qaraýsyz qalǵan úılerdiń birinde jasyrynyp júrgen jerinen ustalsa, endi biri Astana qalasynda qolǵa túsedi. Tergeý barysynda 31 jáne 30 jastaǵy kúdiktiler ustalynyp, qylmystaryn moıyndady», dep málim etti baspasóz qyzmetindegiler.
Qazirgi kezde, kúdiktiler ýaqytsha ustaý oqshaýlaǵyshyna toǵytylyp, ústinen QR QK 24-99 babynyń 2 bólimi 1 bólimshesi boıynsha qylmystyq is qozǵaldy. Sondaı-aq, oq atqan qarýlary da izdestirilýde.
