Aqmola oblysynda adam sany az 55 aýyl joıylýy múmkin
Aqmola oblystyq Ekonomıka jáne bıýdjettik josparlaý basqarmasynyń málimetinshe, búginde aýyldarda 385 myń adam nemese óńir halqynyń jalpy sanynyń 52 paıyzy turady (733,9 myń adam). Aýyldyq eldi mekenderdi damytý boıynsha júrgizilip jatqan is-sharalarǵa qaramastan, halyqtyń aýyldyq jerlerden ketýi baıqalyp otyr.
«Óńirde 10 jyl ishinde aýyl turǵyndarynyń sany 5 myń adamǵa azaıdy, bul rette qala turǵyndarynyń sany 7,6 myń adamǵa ósti. Ýrbanızatsııa protsesiniń údeıe túsýi aýyldar sanynyń turaqty azaıýyna alyp kelýde. Teriskeıdegi keregesi sógilgen aýyldardyń sany aldaǵy jyldarda kóbeımese, azaıatyn túri joq. «Qazaqstan Respýblıkasynyń ákimshilik-aýmaqtyq qurylysy týraly» Zańǵa sáıkes turaqty halqy 50 adamnan aspaıtyn aýyldar joıylýy tıis. Aqmola oblysynda mundaı 55 aýyl bar. Óńirdegi tútini úzilgeli turǵan eldi mekenderde jalpy sany 1647 adam ǵana turady. Sonyń ishinde Býrabaı aýdanyndaǵy Jańatýǵan aýylynda adam múldem joq», - deıdi Aqmola oblystyq Ekonomıka jáne bıýdjettik josparlaý basqarmasy basshysynyń orynbasary Farıza Baımanova.
Basqarma basshysynyń orynbasary atap ótkendeı, 2011 jyldan beri oblysta jalpy sany 740 adam bolatyn 34 aýyl taratylǵan.
«Oblysymyzda barlyǵy 589 aýyldyq eldi meken bar, onyń teń jartysynyń perspektıvasy bar aýyldar. Ol «Aýyldyq eldi mekenderdi aıqyndaý úshin ólshemsharttardy bekitý týraly» Qazaqstan Respýblıkasy Ulttyq ekonomıka mınıstriniń (2019 jylǵy 13 qyrkúıektegi №81) buıryǵymen belgilengen 15 kórsetkish boıynsha baǵalaý qorytyndysymen aıqyndalǵan. Bul aýyldarda 364 myń adam, ıaǵnı óńirdegi aýyl halqynyń 86 paıyzy turady», - dep tolyqtyrdy Farıza Baımanova.
Aıta ketsek, Memleket basshysy Qazaqstan Respýblıkasynyń aýyldyq aýmaqtaryn damytýdyń 2023-2027 jyldarǵa arnalǵan tujyrymdamasy týraly Jarlyqqa qol qoıǵan bolatyn.
