Aqmola oblysynda Abaıdyń 175 jyldyǵyna oraı myńnan astam shara ótedi
Sharada aımaq basshysynyń orynbasary Aına Mysyrəlimova qazaqtyń uly aqyny, oıshyly, fılosof Abaıdyń 175 jyldyq mereıtoıy keń kólemde ótetinin atap ótti.
«Osydan birer kún buryn elordada Abaı jylyna arnalǵan is-sharalar bastaldy. Bizdiń oblysta bul sharaǵa daıyndyq ótken jyly qolǵa alyndy. Oblysymyzda ótkiziletin is-sharalardyń jospary jasalyp, bekitildi. Sharaǵa memlekettik organdardan bólek, qoǵam ókilderi de tartylady», - dedi Aına Mysyrálimova.
Aqmola oblystyq mádenıet, arhıv jáne qujattamalar basqarmasy basshysynyń mindetin atqarýshy Gúlmıra Beknazarova óńirde myńnan astam is-shara ótkizý josparlanǵanyn aıtty.
Onyń aıtýynsha, Abaıdyń 175 jyldyǵyna arnalǵan is-sharalar shymyldyǵyn Birjan sal aýdanynda «Abaı danalyǵy sal-seriler mekeninde» atty ádebı-tanymdyq jobamen ashý josparlanǵan.
Sonymen qatar, qańtar aıynyń sońynda oblys ortalyǵynda Nur-Sultan qalasyndaǵy QAZ UÓÝ «Jastar» stýdenttik horynyń, K.Kúmisbekov atyndaǵy ulttyq aspaptar orkestri jáne oryndaýshylarynyń qatysýymen «Júregimniń túbine tereń boıla» atty kontserttik baǵdarlama uıymdastyrylady.
Al, oblystyq bilim basqarmasy basshysynyń orynbasary Botagóz Dúısenova oblystyq daryndy balalarǵa arnalǵan №3 mamandandyrylǵan mektep-ınternatyna Abaı esimin berý jáne jaratylystaný-ǵylymı baǵyttan gýmanıtarlyq baǵytqa aýystyrý týraly usynysy engizilgenin atap ótti.
Shoqan Ýálıhanov atyndaǵy Kókshetaý memlekettik ýnıversıtetiniń prorektory Aıgúl Jaqypova Abaı ortalyqtaryn ashqan Belarýs jáne Ázirbaıjan ýnıversıtetteri tájirıbe almasý josparda baryn aıtty.
«Búgingi tańda bul ýnıversıtettermen tyǵyz baılanys ornatylǵan. Máskeýdiń lıngvıstıkalyq ýnıversıtetimen kelissózder júrgizilýde. Ondaǵy maqsat-Abaıdyń mereıtoıyn shetelde nasıhattaý», - dedi Aıgúl Jaqypova.
Sonymen qatar, brıfıngte aıtylǵandaı, «Uly Abaı – nar tulǵa» aqyndar aıtysy, halyqaralyq ǵylymı-praktıkalyq konferentsııasy, QR Eńbek sińgen ártisi Kenjeǵalı Marjyqpaevtyń kontserti, Abaı kóshesiniń boıynda Open air formatyndaǵy festıval tárizdi birqatar sharalar qarastyrylǵan.
