Aqmola oblysynda 9,6 myń adam koronavırýsqa qarsy egildi
KÓKShETAÝ. QazAqparat - Aqmola oblysynda 9 684 adam koronavırýsqa qarsy vaktsınanyń birinshi komponentin aldy, dep habarlaıdy QazAqparat tilshisi.
Aýmaqtyq Sanıtarlyq-epıdemıologııalyq baqylaý departamentiniń málimetinshe, qazirgi kezde KVI-ǵa qarsy vaktsınatsııa júrgizý úshin oblys boıynsha barlyǵy 26 egý pýnkti jumys isteıdi. Kóshpeli egý brıgadalary tońazytqysh qondyrǵysy ornatylǵan refrıjeratorlyq úlgidegi termokonteınerlerdi paıdalanady. Vaktsınany tasymaldaý «sýyq tizbekti» saqtaı otyryp júzege asyrylady.
Kókshetaýda «RIO» saýda, oıyn-saýyq ortalyǵy men Memlekettik kirister departamentinde jyljymaly egý pýnkteri ashyldy.
1-inshi qalalyq emhananyń mobıldi egý brıgadasy terapevt dáriger men egý medbıkesinen turatyn. Kabınetterde kýshetkalar, yńǵaıly dıvandar jáne tońazytqyshtar bar.
«RIO» SOSO-nyń jyljymaly egý pýnktinde bir apta ishinde 425 adam egildi.
Kóshpeli egý brıgadalary ujymdarǵa baryp, qyzmetkerlerge óndiristen qol úzbeı ekpe salýda.
«Aqmola oblysynda 9 684 adamǵa birinshi komponentpen ekpe salyndy. Eldegi eresek halyqtyń kem degende 60 paıyzyna vaktsına salynǵan kezde ujymdyq ımmýnıtetke qol jetkiziledi. Bul karantıdik shekteý sharalarynyń barlyǵyn alyp tastaýǵa múmkindik beredi», - deıdi vedomstvo basshysy Aınagúl Mýsına.
Aıta keteıik, Densaýlyq saqtaý mınıstrligi «elektrondyq úkimet» portalynda «vaktsınatsııaǵa jazylý» jańa qyzmetin iske qosty. Ol úshin azamat «elektrondyq úkimet» portalynda tirkelý jáne tirkelgen jeri boıynsha medıtsınalyq uıymǵa túsetin ótinim berý qajet. Medıtsınalyq uıym vaktsınatsııa ýaqytyn kórsete otyryp, ótinimdi qaraıdy jáne bóledi. Sodan keıin azamat «elektrondyq úkimet» portalynda egý pýnktine baratyn kúni men ýaqytyn kóredi, sondaı-aq qosymsha SMS-habarlama alady.
