Aqmola oblysynda 87 gıdrotehnıkalyq nysan tekserildi
KÓKShETAÝ. QazAqparat - Aqmola oblysynda kóktemgi sý tasqynyn aldyn alý sharalary pysyqtalýda. Bul týraly oblys ákimi Sergeı Kýlagınniń tóraǵalyǵymen ótken ákimdik májilisinde aıtyldy, dep habarlady oblys ákiminiń baspasóz qyzmetinen.
Májiliste baıandama jasaǵan oblys ákiminiń birinshi orynbasary Q.Otarovtyń aıtýynsha, kóktemgi sý tasqynyn boldyrmaý úshin oblystyń ár óńirinde kóshpeli májilis ótkizilip, negizgi mindetter belgilengen.
«Aımaqta tasqyn sýdyń zardabyn boldyrmaý jónindegi oblystyq shuǵyl shtab quryldy.
2015 jyldyń sáýir jáne qarasha aıy aralyǵynda óńirlerdegi 87 gıdrotehnıkalyq nysan tekserilip, nyǵaıtý jumystary júrgizildi.
Oblystyń eldi mekenderinen 680 myń tekshe metr qar shyǵarylyp, 50 myń tonna ınerttik materıaldar, 76,5 myń qap, 400 tonna janar-jaǵar maı daıyndaldy.
Jalpy oblys aýdandary men qalalaryndaǵy tasqyn sý alý qaýpi bar kezeń aralyǵynda kómek kórsetý úshin oblystyń azamattyq qorǵanys qalyptasýlarynda 2 174 adam, 504 birlik ınjenerlik tehnıka, 188 birlik sý sorǵysh tehnıkasy jáne 42 birlik júzý quraly ázirlendi», dedi Q.Otarov sózinde.
Oblys aýmaǵyndaǵy jaǵdaıdy turaqty túrde baqylap, saralaý júrgizip otyrý úshin gıdrometeologııa boıynsha oblystyq ortalyqtyń 29 meteobeketi, 19 gıdrobeketi, 10 agrometeobeketi turaqty túrde jumys isteıdi. Aýdandyq ákimdikterdiń kúshimen ózen sýlarynyń jaǵdaıy men deńgeıin baqylaıtyn 80 qosymsha beket uıymdastyrý da qolǵa alynýda.
«Oǵan qosa, jýyrda «Kóktem-2016» respýblıkalyq komandalyq-shatbtyń oqý-jattyǵýy ótip, kóktemgi sý tasqyny saldarynan týyndaıtyn tótenshe jaǵdaılardyń zardabyn joıý kezinde is-qımyl jáne azamattyq qorǵanys júıesiniń daıyndyǵy pysyqtaldy.
Sonymen qatar, oblys aýmaǵynda sý tasqynyn boldyrmaý maqsatynda ózge de sharalar qolǵa alynýda», dedi oblys ákiminiń orynbasary.
Osy oraıda aımaq basshysy qaýipti Qorǵaljyn, Astrahan, Tselınograd, Arshaly jáne Atbasar aýdandarda sý tasqynyna qarsy sharalardy erte bastaý qajettigin atap ótti. Sondaı-aq, Sileti, Astana jáne Shaǵalaly sý qoımalaryndaǵy sýdyń deńgeıin baqylaýǵa alyp, qaýipti ýchaskeler men bógetterdi nyǵaıtýdy tapsyrdy.
