Aqmola oblysynda 800 gektardan astam jer otqa orandy
KÓKShETAÝ. QazAqparat - Aqmola oblysynda 800 gektardan astam jer órtke orandy. Onyń 650 gektarynda tilsiz jaý aýyzdyqtalsa, 200 gektarda sóndirý jumystary jalǵasýda, dep habarlaıdy QazAqparat tilshisi.
Oblystyq TJD baspasóz qyzmetinen málim etkendeı, 8 tamyz kúni saǵat 21:15 shamasynda Ereımentaý aýdanyndaǵy Qoıtas aýyldyq okrýginiń aýmaǵynda 650 gektar dalalyq alqapta órt shyqty.
«Tilsiz jaýdy aýyzdyqtaýǵa TJD jeke quramynan 29 adam men 5 arnaıy órt sóndirý tehnıkasy, «KazHorseMugalzhar» JShS-nyń 55 jumysshysy jáne jergilikti atqarýshy organdardyń qyzmetkerleri tartyldy. Búgin tańerteń saǵat 09:00 shamasynda órt sóndirildi», - deıdi vedomstvodan.
Budan bólek, osy aýyldyq okrýg aýmaǵynda ornalasqan Qaratal jáne Masaqpaı jaılaýynda da órt shyqqan. Jalyn 200 gektar aýmaqqa taraǵan.
«Qazirgi kezde munda órt sóndirý sharalary júrgizilýde. Buǵan TJD jeke quramynan 50 adam men 11 arnaıy tehnıka, «Ereımentaý» orman sharýashylyǵynyń 14 jumysshysy men 3 tehnıkasy, jergilikti atqarýshy organdardyń 112 qyzmetkeri men 18 tehnıkasy jumyldyryldy«, - dep tolyqtyrdy vedomstvodan.
Sonymen qatar, Aqmola oblystyq TJD-da Ereımentaý aýdanyndaǵy dala órtin sóndirý boıynsha jedel shtab quryldy. Osyǵan qatysty kez kelgen málimet boıynsha 8716-2-55-14-80 habarlasýǵa bolady. Jaǵdaıdy óńirdiń TJD basshysy óz baqylaýyna aldy.
