Aqmola oblysynda 80 kompanııa eksportpen aınalysady
KÓKShETAÝ. QazAqparat - Aqmola oblysynda 80 kompanııa eksport baǵytynda jumys isteıdi, dep habarlaıdy QazAqparat tilshisi.
Aqmola oblystyq ishki saıasat basqarmasy baspasóz qyzmetiniń málimeti boıynsha, elimiz dúnıejúzi boıynsha astyq eksporttaýshy 50 memlekettiń qatarynda. Aqmola oblysy elimizdegi agrarly óńir sanalady. Respýblıkadaǵy astyqtyń tórtten biri Aqmola oblysynda óndiriledi. Jyl saıyn 2-2,5 mıllıon tonna astyq eksportqa shyǵarylady.
2018 jyldyń qańtar aıynda Reseı, Qytaı, Orta Azııa, Eýropa, Taıaý Shyǵys elderiniń naryǵyna aqmolalyq dıqandar 300 myńnan astam tonna astyq jóneltken.
Aqmolalyqtar óndiretin mal azyǵyna kórshi elderden suranys joǵary. 2017 jyly Reseı, Iran, Ózbekstan jəne Qytaı eline 130 mıllıonnan astam tonna mal azyǵy jetkizildi.
Oblysta óz brendterin syrtqy naryqqa shyǵaratyn, eksport baǵytynda jumys isteıtin 80 kompanııa bar. Negizinen ónimniń kóp bóligi kórshi Reseı, Qytaı jəne Ózbekstan elderine eksporttalady.
Onyń ishinde Reseı naryǵyna et ónimderin shyǵaratyn tanymal «Bakkara», «KazBeef» jáne «Kýrochka Rıaba» tərizdi kompanııalary men sút ónimin shyǵaratyn «Rodına» agrofırmasy bolsa, Qytaıǵa «Atbasar» men «Bota-2015» seriktestikteri un, et ónimderin jetkizedi.
Al «Qazger qus» seriktestigi Ortalyq Azııa jəne Taıaý Shyǵys elderiniń naryǵyna jumyrtqa satýda.
"Aqmola oblysynyń azyq-túlik brendi elimizdiń tabıǵı sapaly ónim shyǵaratyndyǵy týraly oń kózqaras qalyptastyrady", - dep túsindirdi oblystyq aýyl sharýashylyǵy basqarmasy basshysynyń mindetin atqarýshy Dımash Talasbaev.
