Aqmola oblysynda 8 naýryz merekesine oraı bir top arýlar marapatqa ıe boldy

KÓKShETAÝ. QazAqparat - «Kókshetaý» mádenıet saraıynda 8 Naýryz - Halyqaralyq áıelder kúnine oraı oblystyń áleýmettik-ekonomıkalyq damýyna eleýli úles qosyp júrgen názik jandarǵa qurmet kórsetildi, dep habarlaıdy QazAqparat tilshisi.

«Kókshetaý» mádenıet úıinde uıymdastyrylǵan saltanatty sharada aımaq basshysy Ermek Marjyqpaev óziniń quttyqtaý sózinde elimizde otbasy ınstıtýtyn qoldaý máselelerine erekshe kóńil bólinetinin, ana men balany áleýmettik qorǵaý sharalary halyqtyń ál-aýqatyn jaqsartýǵa baǵyttalǵanyn, sondaı-aq, kópbalaly analarǵa jan-jaqty memlekettik qoldaý kórsetiletinin atap ótti.

«Halyqaralyq áıelder kúni qarsańynda, eń shynaıy jáne júrekjardy quttyqtaýlardy qabyl alyńyzdar. Bul kóktem kúni árqashan gúlder men syılyqtarǵa toly, qýanyshpen, kúnniń jaıma shýaq nurymen jarqyraıdy. Qazaqstandyq áıelderdiń jasampaz úlesinsiz elimizdiń tarıhyn, damýyn elestetý múmkin emes. Názik jandy arýlarymyz adal eńbekterimen aımaqtyń damýyna laıyqty úles qosyp keledi. Balalardy tárbıeleýmen aınalysyp qana qoımaı, erlermen qatar oshaqtyń qamqorshysy bolyp, ártúrli salalarda kásibı bıikterge jete biletin hanymdarǵa qurmetimiz erekshe. Sizderge shyn júrekten densaýlyq, uzaq ómir jáne sarqylmas qýat tileımin», – dep atap ótti Ermek Marjyqpaev.

Saltanatty sharada 7 balanyń analary – Vıoletta Álıeva, Gúldana Ámirjanova, Quralaı Jumabekova, Leıla Qojahmetova «Altyn alqamen», 6 bala tárbıelep otyrǵan analar – Mánsııa Bájikenova, Roza Iskarenova, Saıran Kúlshikova, Aleksandra Maevskaıa, Vera Shaýbert «Kúmis alqamen» marapattaldy.

Sondaı-aq, oblystyń áleýmettik-ekonomıkalyq damýyna eleýli úles qosyp júrgen ózge de názik jandarǵa qurmet kórsetildi.

Merekelik kesh sońy ásem án men kúmbirlegen kúıden shashý shashylǵan kontserttik baǵdarlamaǵa ulasty.

Aıta ketsek, Aqmola oblysynda 58 medıtsınalyq nysan men mektep salynady.