Aqmola oblysynda 700-ge jýyq maldan brýtsellez belgileri anyqtaldy

KÓKShETAÝ. QazAqparat – Aqmola oblysynda brýtsellezben syrqattanýshylyq boıynsha epıdemıologııalyq jaǵdaı turaqty. Oblysta bes adamnyń brýtsellezge shaldyqqany anyqtaldy, bul – ótken jyldyń sáıkes kezeńimen salystyrǵanda 2,2 ese tómen. Bul týraly brıfıngte Aqmola oblysynyń bas memlekettik sanıtarııalyq dárigeri Aınagúl Mýsına málim etti, dep habarlaıdy QazAqparat tilshisi.

Departament basshysynyń aıtýynsha, syrqattanýshylyq Arshaly jáne Zerendi aýdandarynda bir jaǵdaıdan, Kókshetaý qalasynda 3 jaǵdaı tirkelgen. Balalar arasynda brýtsellez jaǵdaılary tirkelgen joq.

«Eki jaǵdaıda brýtsellezben aýyrǵan úı janýarymen baılanys sebep bolǵan, al qalǵan úsh jaǵdaıda ınfektsııa kózi anyqtalmady. Degenmen, satyp alynǵan et jáne sút ónimderin tutyný deregi bar», - dedi Aınagúl Mýsına.

Óńirdiń bas memlekettik sanıtarlyq dárigeri atap ótkendeı, bıylǵy 6 aıda brýtsellez belgileri baıqalǵan 607 iri qara men 86 qoı-eshki anyqtaldy. Bul janýarlarymen baılanysta bolǵan 590 adam, onyń ishinde 11 bala tekserildi.

Aıta ketsek, budan buryn Aqmola oblysyndaǵy aýyl brýtsellezge baılanysty karantınge jabylǵanyn jazǵan edik.