Aqmola oblysynda 7 sút fermasy iske qosylady - aımaq basshysy
Kóktemgi egis jumystarynyń bastalýyna oraılastyrylǵan jıynda dıqandardyń egin sebý naýqanyna daıyndyq, agroónerkásiptik sektordy damytýdyń jaı japsary taqylandy.
«Aqmola oblysy 2 mıllıon tonnadan astam aýyl sharýashylyǵy ónimin óndiretin elimizdegi iri astyqty óńir sanalady. Óńirde ósimdik sharýashylyǵymen birge mal sharýashylyǵy da qatar damýda. Búgingi tańda oblysta 190 000 tonna et óndirildi. Sút ónimi men jumyrtqa óndirisine erekshe nazar aýdarylyp keledi. Aldaǵy ýaqytta 46 jańa fermany iske qosý josparlanǵan. Osy baǵytta, alǵash ret óńirde sút fermalaryna 15 mıllıard teńgeden astam qarjy bólindi. Memlekettiń qoldaýynyń arqasynda 2000-ǵa jýyq aýyl sharýashylyǵy taýaryn óndirýshi qaıtarymsyz granttar aldy. Jaqyn arada 7 sút fermasyn iske qosamyz. Biz aýyl sharýashylyǵyn damytý arqyly aýylda óndiris qurýdy jáne aýyl turǵyndaryn jumyspen qamtýdy kózdep otyrmyz», - dedi aımaq basshysy Ermek Marjyqpaev.
Osy rette, Aqmola oblysynda aýyl sharýashylyǵy taýarlarynyń óndirisi artqany baıqalady.
«Naqtyraq aıtsaq, 23 000 lıtr ósimdik maıy, 231 000 un shyǵaryldy. Budan bólek, kókónis qoımalary ulǵaıtylyp, kartop pen basqa da kókónis túrlerin saqtaý boıynsha 3 joba iske asyryldy», - dep tolyqtyrdy aımaq basshysy.
Kezdesý barysynda barlyq aýdandardyń ákimderi men sharýa qojalyqtarynyń basshylaryna kóktemgi egiske daıyndyq jumystaryn pysyqtaýǵa, onyń ishinde tehnıkalardyń daıarlyǵy men janar-jaǵar maımen qamtamasyz etý máselesin nazardan shyǵarmaý tapsyryldy.
Aıta ketsek, Kókshetaýdaǵy aýyl sharýashylyǵy jármeńkesinde 74 mln teńgeniń ónimi saýdaǵa shyǵaryldy.
