Aqmola oblysynda 7 qoqys polıgony salynady
NUR-SULTAN. QazAqparat – Aqmola oblysynda qatty turmystyq qaldyqtardyń 7 jańa polıgony salynady. Bul týraly óńir ákimi Ermek Marjyqpaev óńir eldi mekenderin gazban qamtamasyz etýge qatysty aıtty, dep habarlaıdy QazAqparat tilshisi.
«Ekologııalyq ahýalǵa baılanysty jaǵdaı barynsha ózekti bolyp qalýda. Oblysta sheshim talap etetin birqatar ekologııalyq máseleler bar ekeni ózderińizge belgili. Ekologııalyq ahýaldy jaqsartý úshin, oblys ákimdigi salalyq mınıstrliktermen birlesip, óńirdiń ekologııalyq máselesin 2024 jylǵa deıin keshendi sheshýdiń jol kartasyn ázirlep bekitti», - dedi E. Marjyqpaev Ortalyq kommýnıkatsııalar qyzmetinde.
Onyń aıtýynsha, bul qujatta atmosferaǵa zııandy shyǵarylatyn zattardy tazalaý jáne tómendetý boıynsha qazirgi zamanǵy tehnologııalardy engizý, gazıfıkatsııalaý, qatty-turmystyq qaldyqtardyń 7 jańa polıgonyn salý, Şýchınsk-Býrabaı kýrorttyq aımaǵynyń kólderin tazalaý, 5 elektrstantsııa salý jáne taǵy basqa da jobalar qarastyryldy.
Osy oraıda qatty-turmystyq qaldyqtardyń jeti jańa polıgony Şýchınsk, Aqkól qalalarynda, Qorǵaljyn men Arshalyda, Qosshyda, Koıandy men Zerendide ornalasady.
Sonymen qatar Kókshetaý qalasynda qoqysty suryptaýmen turmystyq qaldyqtardyń jańa polıgonyn salý boıynsha jańa joba ázirlendi.
Qazirgi kezde ony rásimdeý jumysy atqarylyp jatyr.
