Aqmola oblysynda 7 balanyń anasyna «Altyn alqa» tapsyryldy
KÓKShETAÝ. QazAqparat - 8 Naýryz - Halyqaralyq áıelder kúnine oraı, Aqmola oblysynyń ákimi Málik Myrzalın óńirdiń áleýmettik-ekonomıkalyq damýyna úles qosqan bir top qyz-kelinshekterdi merekelerimen quttyqtap, Alǵys hatpen marapattady, dep habarlaıdy QazAqparat tilshisi.
Ult pen urpaqtyń besigin terbetip, tárbıesin túzegen, tilimiz ben dilimizdi sanamyzǵa sińirgen Ana degen qurmetti atqa ıe ardaqty jandarǵa arnalǵan saltanatty jıyn oblys ákimi Málik Myrzalınniń quttyqtaýymen bastaldy. Ár salada eńbek etetin er azamattardyń áıelder qaýymyna joldaǵan beınequttyqtaýy da merekeniń shyraıyn asha tústi.
«Aqmola oblysy óziniń biregeı tabıǵatymen, kórikti jerlerimen qatar parasatty, eńbekqor, sulý qyzdarymen tanymal. Olar ózderiniń eren eńbekterimen óńirdiń damýyna jáne órkendeýine zor úles qosýda. Búgin, osy zalda eńbek ardagerleri, kóp balaly analar, sondaı-aq qurylys, ónerkásip jáne aýyl sharýashylyǵy, bıznes salasy, kólik pen baılanys, bilim berý men ǵylym, densaýlyq saqtaý, mádenıet jáne sport, úkimettik emes salalarda kózge túsip júrgen áıelder qatysyp otyr. «Álemdegi ásemdik pen sulýlyq áıel kórki men ana meıiriminen nár alǵan» degen danalyq sóz bar. Rasynda, adamzat ómiriniń irgetasy áıeldiń qolymen qalanady. Áıel qashan da tirshiliktiń shyraıy, otbasynyń shyraǵy. Sondyqtan da, asyl analarymyz ben qaryndastarymyzdyń orny erekshe», - deı kele, oblys ákimi Málik Myrzalın barsha áıelder qaýymyn tól merekelerimen shyn júrekten quttyqtap, izgi tilegin arnady.
Qazir óńirde 7 myńnan astam kóp balaly ana turyp jatyr. Olardyń 2,5 myńnan astamy «Altyn alqa», 3,7 myńnan astamy «Kúmis alqa» ıegerleri. Saltanatty jıyn barysynda aımaq basshysy Kókshetaý qalasynyń turǵyny Tazagúl Jádigerovaǵa «Altyn alqa», Zerendi aýdanynyń turǵyny Sulýshash Dajınge «Kúmis Alqa» medalin tapsyrdy. Sonymen qatar, óńirdiń áleýmettik-ekonomıkalyq damýyna qosqan úlesteri úshin ár salada qyzmet isteıtin bir top qyz-kelinshekter Alǵys hatpen marapattaldy.
Oblysta er adamdarmen qatar, saıası-qoǵamdyq is-sharalarǵa belsene aralasyp, elimizdiń damýy úshin aıanbaı ter tógip júrgen názik jandy arýlardyń sany arta túsýde. Máselen, túrli deńgeıdegi máslıhat depýtattarynyń 70-ten astamy áıel. Sonymen qatar, bir oblys ákiminiń orynbasary, bir aýdan ákimi áıel jáne memlekettik qyzmetshilerdiń arasynda basshylyq laýazymynda 20-dan astam arý abyroımen qyzmet atqaryp keledi. Sondaı-aq, oblystaǵy shaǵyn jáne orta bıznestiń alpys paıyzyn áıelder qaýymy qurap otyr. Shuǵylaly kóktemniń osy bir alǵashqy meıramynda sahna tórinen shyrqalǵan án de, názik jandylarǵa usynylǵan gúlder de, izgi nıetti jyly lebizder de áıel beınesin, onyń kórkemdigi men ásemdigin áspetteı tústi.
Merekelik shara kontserttik baǵdarlamaǵa ulasty.
