Aqmola oblysynda 69 eldi mekende derbes bıýdjet engiziledi
Sharaǵa Aqmola oblysynyń ákimi Málik Myrzalın, QR QR Ulttyq ekonomıka vıtse-mınıstri Aıbatyr Jumaǵulov, QR Qarjy vıtse-mınıstri Berik Sholpanqulov, Aıgúl Soloveva jáne Soltústik Qazaqstan, Qostanaı, Qaraǵandy jáne Aqmola oblystary ákimderiniń orynbasarlary, aýdandyq mańyzy bar qalalardyń, aýyldar men kentterdiń, aýyldyq okrýgterdiń ákimderi qatysty.
Forýmda aımaq basshysy Elbasy Nursultan Nazarbaevtyń «Áleýmettik-ekonomıkalyq jańǵyrtý -Qazaqstan damýynyń basty baǵyty» Joldaýynda jergilikti jerlerdegi máselelerdi sheshýde turǵyndardy tartý maqsatynda jergilikti ózin-ózi basqarýdy damytý baǵytynda qoıylǵan mindetterdiń óńirde júzege asyrylý barysyna toqtaldy.
«Aldaǵy jyldan bastap Aqmola oblysynda 2 myńnan astam turǵyny bar 69 eldi mekende derbes bıýdjet engiziletin bolady. Al, 2020 jyldan bastap, 177 ákimshilik birlikte (barlyǵy 246) josparlanǵan.
Bizdiń oblys ózin-ózi basqarý zańynyń ázirlenýine belsendi atsalysty. Derbes bıýdjetke kóshý baǵytynda óńirlerdi daıyndaý boıynsha aýqymdy jumystar atqaryldy. Ákimdikterdiń apparattary joǵary jyldamdyqty ınternetpen tolyq qamtamasyz etildi. Aýyl ákimdikterin kompıýterlermen qatamasyz etý boıynsha jumystar júrgizilýde», - dedi M.Myrzalın.
Sonymen qatar aımaq basshysy salyq tóleý bazasyn naqtylaý boıynsha memlekettik málimetter bazasy qaıta qaralyp, naqtylanyp jatqanyn atap ótti.
«Jergilikti ózin-ózi basqarý organdarynyń kadrlyq quramynyń sapasyn arttyrý maqsatynda aýyldyq okrýg ákimderi, apparat qyzmetkerleriniń bıýdjetti josparlaý jáne bıýjet shyǵysy, salyq tóleý, memlekettik satyp alý máseleleri boıynsha biliktiligin kóterý jumystary júrgizildi. Kommýnaldyq menshik jáne derbes bıýdjetti engizý boıynsha aqparttyq-túsindirý toptary oqý semınarlaryn ótkizdi.
QR Ulttyq ekonomıka mınıstrliginiń «Zerde» oqytý ortalyǵymen birlesip, aýyl ákimderi úshin Astana jáne Kókshetaý qalalarynda arnaıy oqý semınarlary uıymdastyryldy. Memlekettik qyzmetshilerdi oqytýdyń óńirlik ortalyǵynda 2 myńnan astam aýyldyq okrýg ákimderi men mamandary jáne 160 jýyq aýdandyq ekonomıka jáne qarjy bólimderiniń qyzmetkerleri oqytyldy», - dedi aımaq basshysy.
