Aqmola oblysynda 66 jastaǵy zeınetker órtten kóz jumdy
KÓKShETAÝ. QazAqparat – Aqmola oblysynda 66 jastaǵy zeınetker órtten kóz jumdy. Bul týraly brıfıngte memlekettik órt baqylaý basqarmasynyń bastyǵy Dýman Daleshov málimdedi, dep habarlaıdy QazAqparat tilshisi.
Onyń aıtýynsha, ótken órt qaýipsizdigi kezeńinde oblysta 24 orman órti jáne 20 órt oqıǵasy tirkelgen. Bul ótken jyldyń sáıkes kezeńimen salystyrǵanda alty ese joǵary.
Negizinen órttiń kóbisi qaraýsyz qalǵan ot, tastalǵan temeki tuqyly men sirińke, kólik quraldarynyń sóndirgishinen shyqqan ushqyn, shóp jaǵý, lınza sııaqty iske qosylatyn shyny synyqtarynan bolyp otyr.
«Departament balalar men jasóspirimderdiń jazǵy demalys oryndarynyń, sondaı-aq qaýipti aýmaqtar men orman alqaptaryndaǵy pansıonattar men sanatorıılerdiń órt qaýipsizdigi salasynda tekserýler júrgizedi, olar mamyr aıynyń sońyna deıin aıaqtalady. Mobıldi toptar ormanda órt qaýipsizdigi talaptary men sanıtarlyq erejelerdi buzý anyqtalǵan jaǵdaıda, sondaı-aq qaldyqtar men qurǵaq ósimdikterdi órtegeni úshin Ákimshilik quqyq buzý kodeksiniń 336 jáne 367-baptary boıynsha ákimshilik jaýapkershilikke tartady», - dep atap ótti D.Dáleshov
Onyń aıtýynsha, 26 mamyrda saǵat 07:45-te Birjan sal aýdanynyń Makınka aýylynda jeke turǵyn úıde órt shyqty. Órt aýmaǵy 100 sharshy metrdi qurady.
Órttiń sebepterin anyqtaý úshin synaq-órt zerthanasy jáne MMS taǵaıyndaldy.
«Sáýir aıynda qaıtys bolǵan adammen turmystaǵy órt qaýipsizdigi erejelerin túsindirý boıynsha profılaktıkalyq áńgime ótkizilgen edi», - dep tolyqtyrdy D.Dáleshov.
