Aqmola oblysynda 650-den astam kópbalaly otbasy esepke alyndy
KÓKShETAÝ. QazAqparat - Aqmola oblysynda eki kúnde 664 kópbalaly otbasy anyqtalyp, esepke alyndy, dep habarlaıdy QazAqparat tilshisi oblystyq TJD baspasóz qyzmetine silteme jasap.
Departamenttiń málimeti boıynsha, 2018-2019 jyldardaǵy jylý maýsymy bastalǵaly Aqmola oblysynyń aýmaǵynda 206 órt tirkelgen. Osynyń saldarynan 24,3 mıllıon teńgeden astam materıaldyq shyǵyn keltirilgen. Órtten jáne ıis tıip 12 adam qaza bolsa, 5 adam jaraqat alǵan.
Óńirde turǵyndardyń órt qaýipsizdigi talaptarynyń oryndalýyn qadaǵalaý jáne qaıǵyly jaǵdaılardyń boldyrmaý maqsatynda TJD men onyń aýmaqtyq jáne vedomstvolyq baǵynysty mekemeleriniń qyzmetkerleri úı-úıdi aralap, turǵyndarǵa saqtyq sharalaryn túsindirdi.
«Aqmola oblysynyń aýmaǵynda 2 kún ishinde 7 350 jer úı tekserilip, 18 313 azamatqa nusqaý berildi, 162 adamdy qamtıtyn 6 jıyn uıymdastyryldy. Túsindirý jumystaryna Aqmola oblystyq TJD 580 qyzmetkeri tartyldy. Tekserý barysynda 188 ýaqytsha baspana men 664 kóp balaly otbasy anyqtalyp, esepke alyndy», delingen habarlamada.
