Aqmola oblysynda 61 kópqabatty úı jylýmen jabdyqtaý júıesine qosyldy

KÓKShETAÝ. QazAqparat - Aqmola oblysynda birqatar jobalardy iske asyrý arqyly qosymsha 61 kóp qabatty turǵyn úıdi, 454 jeke turǵyn úıdi jáne 31 áleýmettik mádenı-turmystyq nysandi jylýmen jabdyqtaý júıesine qosýǵa, sondaı-aq, eldi mekenderde jylýmen jabdyqtaý sapasyn jaqsartýǵa múmkindik týdy. Bul týraly brıfıngte Aqmola oblysynyń energetıka jáne turǵyn-úı kommýnaldyq sharýashylyǵy basqarmasy basshysynyń orynbasary Tımýr Hamzın aıtty, dep habarlaıdy QazAqparat tilshisi.

«2020-2021 jyldardaǵy jylý berý maýsymyna daıyndyq kezinde jylý kózderi men jylý jelilerin jóndeýge jáne jańǵyrtýǵa aıtarlyqtaı qarajat bólindi. Osy maqsatta «Aýyl el besigi», «Jumyspen qamtýdyń jol kartasy» jáne basqa da memlekettik baǵdarlamalar boıynsha 10 mıllıard teńge bólindi. Bul 2019 jylmen salystyrǵanda 4 esege artyq», - dep atap ótti T.Hamzın.

Basqarmasy basshysy orynbasarynyń aıtýynsha, Ereımentaý qalasynda, Býrabaı kentinde, Aqkól qalasynda, Shortandy, Zerendide qazandyqtardy qalpyna keltirý, Astrahanka aýylynda qazandyq, Makınsk qalasynda Blokty-modýldi qazandyq salý, Kókshetaý jáne Ereımentaý qalalarynda, Krasnoıar jáne Astrahanka aýyldarynda jylýmen jabdyqtaý jelilerin salý jáne qalpyna keltirý boıynsha jumystar júrgizilgen. Sondaı-aq Makınsk qalasynda kómir qazandyǵynyń qurylysy jalǵastyrylǵan, ony iske asyrý 2014 jyly toqtatylǵan. Sońǵysy is júzinde aıaqtaldy jáne qymbat mazýt qazandyǵyn aýystyrdaı jaǵdaıda óńir jyl saıyn shamamen 200-250 mıllıon teńge únemdemek.

«Atalǵan jobalardy iske asyrý qosymsha 61 kóp qabatty turǵyn úıdi, 454 jeke turǵyn úıdi, 31 Áleýmettik mádenı - turmystyq nysandy jylýmen qamtýǵa múmkindik berdi, sondaı-aq eldi mekenderdegi jylýmen jabdyqtaý sapasyn jaqsartty», - dep tolyqtyrdy T.Hamzın.

Osylaısha, Ereımentaý qalasynda eki qazandyq iske qosylady, bul jeke kóp qabatty turǵyn úılerge qosymsha jylýmen jabdyqtaý qyzmetterin usynýǵa múmkindik beredi. Makınsk qalasynda blokty-modýldi qazandyqtyń qurylysy, sondaı-aq 20 jylǵa jýyq jylýsyz bolǵan kóp qabatty 20 turǵyn úıdi qosýǵa múmkindik beredi. Kókshetaý boıynsha qosymsha jylý júktemelerin sheshetin besinshi gaz-mazýt qazandyǵyn qaıta qurý aıaqtalýda.

Budan bólek, basqarma basshysynyń orynbasary keıbir aqmolalyqtardyń aǵymdaǵy qystaǵy jylýmen jabdyqtaý máselesine qatysty nege shaǵymdanǵanyn aıtty.

«Qańtar aıynyń basynda aýa temperatýrasynyń keı jerlerde -30ºS deıin jáne odan tómen tómendeýine baılanysty Ereımentaý, Arshaly aýdandary men Kókshetaý qalasynda temperatýralyq rejımdi saqtamaý faktileri oryn aldy. Bul faktiler tuıyq úılerde gıdravlıka jetkiliksiz jáne jylý rejımi jetkiliksiz bolǵandyqtan paıda boldy. Sonymen qatar, úıler tolyq daıyn emes. Tıisti jylý oqshaýlaý bolǵan joq, jylýmen jabdyqtaý júıesindegi jobalyq shemadan aýytqýlar boldy. Jergilikti atqarýshy organdar osyndaı olqylyqtardy joıý boıynsha barlyq qajetti is-sharalardy júrgizdi», - dep túsindirdi spıker.

Búgingi tańda Aqmola oblysynda jylý berý maýsymy shtattyq rejımde ótýde, temperatýra rejımi bekitilgen jylý kestesine sáıkes saqtalǵan.

Aslan Ospanov.