Aqmola oblysynda 60 páterli turǵyn úı paıdalanýǵa berildi
KÓKShETAÝ. QazAqparat - QR Táýelsizdik kúni merekesine oraı Aqmola oblysynyń Tselınograd aýdanynda 60 páterli turǵyn úı paıdalanýǵa berildi, dep habarlaıdy QazAqparat tilshisi aýdandyq ákimdiktiń baspasóz qyzmetine silteme jasap.
Aýdanda «Nurly jer» jáne «7-20-25» memlekettik baǵdarlamalary oıdaǵydaı júzege asyrylýda. Osynyń arqasynda turǵyn úı qurylysy sektory men ıpotekalyq nesıelendirý naryǵynda oń ózgerister baıqalady. Atalmysh baǵdarlamalar halyqtyń ómir súrý sapasyn jaqsartýǵa baǵyttalǵan kóptegen baǵyttardy qamtıdy. Sonyń biri «BAT 12 Astana» qurylys-ınvestıtsııalyq kompanııasy óz qarajaty esebinen salynǵan kóppáterli turǵyn úı. Baspanaly bolǵandardyń arasynda «Turǵyn úı qurylys jınaq banki» salymshylary, «Dıplommen aýylǵa» baǵdarmasy arqyly kelgen mamandar men turǵyn úı kezeginde turǵandar bar.
Jańa páterlerdiń kiltin aýdan ákimi Málǵajdar Tátkeev tabys etip, qýanysh ıelerin quttyqtady.
«Kóppáterli turǵyn úı qurylysy bizdiń óńirimizdiń áleýmettik-ekonomıkalyq damýynyń taǵy bir qadamy, ıaǵnı bizdiń jerlesterimizdiń ómiriniń jaqsarýy. Astananyń 20 jyldyǵyna jáne Tselınograd aýdanynyń 90 jyldyǵyna oraılastyrylǵan qonystoı eki ese kóp qýanyshty bolaryna kámil senemin. Árbir úıge jylýlyq, jaılylyq pen ıgilik tileımin. Jańa úıdiń qabyrǵasynda árqashan sizdiń balalaryńyzdyń bet-álpetterinen qýanysh pen kúlki ketpesin», - dedi aýdan ákimi Málǵajdar Tátkeev.
«BAT 12 Astana» qurylys-ınvestıtsııalyq kompanııasynyń dırektory Erden Barenovanyń aıtýynsha 2017 jyly kompanııaǵa Aqmol aýylynan 60 páterlik turǵyn úı salý úshin aýmaǵy 3428,7 sharshy metr bolatyn 0,22 gektar jer bólingen. Turǵyn úı qurylysyna energııa únemdeıtin jáne órt qaýipsizdigi talaptaryna sáıkes keletin zamanaýı qurylys materıaldary qoldanyldy.
Úsh podezdi úıde 60 páter bar, onyń 30-y bir bólmeli jáne 30-y eki bólmeli. Bir bólmeli páterdiń aýdany - 35 sharshy metr, eki bólmeli páterdiń aýdany - 56 sharshy metrdi quraıdy. 1 sharshy metrdiń quny - 150 myń teńge. Bir bólmeli páterdiń quny - 5 250 000 teńge, eki bólmeli páterdiń quny - 8 400 000 teńge.
