Aqmola oblysynda 6 myńǵa jýyq oqýshy avtobýspen tasymaldanady
Balalardy bilim berý uıymdaryna tasymaldaýdy uıymdastyrý barysynda olardyń qaýipsizdigin qamtamasyz etý, mektep avtobýstarymen tasymaldaýdy júzege asyrý kezinde jol-kólik oqıǵalarynyń aldyn alýǵa baǵyttalǵan sharaǵa memlekettik organdardyń, jasóspirimder isi jónindegi komıssııa, ata-analar qaýymdastyǵy, eńbek ujymdary, jergilikti polıtsııa qqyzmeti men BAQ ókilderi qatysýda.
Aqmola oblystyq bilim basqarmasy basshysynyń orynbasary Botakóz Dúısenovanyń aıtýynsha, aktsııa barysynda aýdandar men qalalarda oqýshylardy tasymaldaýmen aınalysatyn 182 avtobýstyń (onyń 142-i bilim bólimderine, 29-y aýdan ákimdikterine, 11-i ózge sharýashylyq sýbektilerine) tehnıkalyq talaptarǵa sáıkestigin, tahograftardyń bar bolýy jáne jaramdylyǵy týraly málimetter, balalardy bilim berý mekemelerine turaqty tasymaldaýdy júzege asyratyn avtokólikterdiń tehnıkalyq baıqaýdan ótýin, júrgizýshilerdiń quramyn (tıisti sanattarynyń bolýyna, júrgizýshiniń ótili, jolda tártip saqtaý ádetteri) tekserý, qozǵalys shemasynyń bar bolýy sııaqty birqatar tehnıkalyq talaptary tekserildi.
«Aktsııa balalar men olardyń ata-analaryna jáne qoǵam ókilderine balalardy tasymaldaý erejesi men qaýipsizdigin saqtaýdy eske salady. Jalpy, oblysta mektep oqýshylaryn tasymaldaý máselesi bilim basqarmasynyń jiti baqylaýynda», - deıdi Botakóz Dúısenova.
Vedomstvo keltirgen málimetterge qaraǵanda, oblystyń barlyq mektepterinde jol qozǵalysy erejesin túsindirý boıynsha «Jarqyn bol!» taqyrybynda synyp saǵattary tárizdi birqatar sharalar ótkizildi.
Aıta keteıik, 2019-2020 oqý jyly óńirde 5945 oqýshyny tasymaldaý uıymdastyrylyp otyr. Onyń ishinde 5587 bala nemese 93 paıyzy kúndelikti, 358 apta saıyn tasymaldanady. Buǵan 182 avtobýs jumyldyrylyp otyr.
