Aqmola oblysynda 6 aılyq baladan koronavırýs anyqtaldy
KÓKShETAÝ. QazAqparat – Aqmola oblysynda taǵy 15 adamnan koronovırýs anyqtaldy. Naýqastardyń arasynda 6 aılyq sábı de bar, dep habarlaıdy QazAqparat tilshisi.
Oblystyq taýarlar jáne kórsetiletin qyzmetterdiń sapasy men qaýipsizdigin baqylaý departamentiniń baspasóz qyzmetiniń málimetinshe, sońǵy táýlikte koronavırýs juqtyrǵan 15 naýqastyń 11-i Kókshetaý qalasynda, 1-eýi Jarqaıyń aýdanynda, 3-eýi Sandyqtaý aýdanynda (onyń ekeýi Kamenka jáne bireýi Preobrajensk aýyldarynda) tirkeldi. Naýqastardyń arasynda 2020 jyldyń qańtar aıynda týǵan sábı de bar.
«Naýqastardyń ekeýi dertti Nur-Sultan qalasynan juqtyryp kelgen. Bir adam Almatydan Aqkólge kelgen, taǵy úsh adam jerleý rásimine qatysqan, bir áıel osyǵan deıin indet juqtyrǵan otbasymen baılanysta bolǵan. Taǵy bir adam jumysynda áriptesinen juqtyryp alǵan», - deıdi vedomstvodan.
Vedomstvodan atap ótkendeı, Aqmola oblysynda koronavırýs juqtyrǵandardyń sany 242 adamdy qurady.
