Aqmola oblysynda 58 jylqy urlaǵan barymtashylar ustaldy
KÓKShETAÝ. QazAqparat - Aqmola oblysynda 58 jylqyny urlaǵan kúdiktiler ustaldy, dep habarlaıdy QazAqparat tilshisi oblystyq PD baspasóz qyzmetine silteme jasap.
Vedomstvonyń málimetinshe, 2019 jylǵy qyrkúıektiń 17-de Ereımentaý aýdandyq polıtsııa bólimine jergilikti turǵynnan aryz túsken. Onyń sózinshe, jaıylyp júrgen 58 jylqysy joǵalǵan. Shyǵyn kólemi - 17 mıllıon teńge.
«Aqmola oblysynyń PD krımınaldy polıtsııa qyzmetkerleri men Ereımentaý aýdanynyń polıtseıleri júrgizgen jedel-izdestirý sharasy barysynda Tselınograd aýdany jáne Nur-Sultan qalasynyń 26 jáne 41 jastaǵy turǵyndary ustaldy. Tergeý kezinde anyqtalǵandaı, kúdiktiler qaraýsyz jaıylyp júrgen jylqylardy Ereımentaý aýdanynan aıdap áketip, Arshaly aýdanynyń Qostomar aýylyndaǵy sharýashylyq qorasyna qamaǵan. Keıin «MAN» júk kóliginiń konteınerine tıep, Nur-Sultan qalasyna jetkizbek bolǵan. Alaıda, arada birer saǵat ótkende biraz jylqy aýa jetpeı konteınerdiń ishinde tunshyǵyp, ólip qalǵan», - deıdi vedomstvodan.
Osyǵan deıin habarlanǵandaı, Nur-Sultan qalasynan Kókshetaý baǵytynda 200 metr qashyqtyqta jylqylardyń óleksesi tabylǵan edi. Anyqtalǵandaı, janýarlar kúdiktilerdiń júk kóliginen túsirilgen.
«Qazirgi kezde mal urlyǵyna qatysty QR QK 188-babynyń 4-bóligi boıynsha is qozǵalyp, sotqa deıingi tergeý júrgizilýde. Kúdiktiler ýaqytsha ustaý oqshaýlaǵyshyna qamaldy», - dep tolyqtyrdy vedomstvodan.
