Aqmola oblysynda 58 medıtsınalyq nysan men mektep salynady
Vıtse-premer «Fosterlik otbasylar», «Aýyl Amanaty», «Aýyldyq densaýlyq saqtaýdy jańǵyrtý», «Jaıly mektep», dýaldy oqytý tárizdi memlekettik baǵdarlamalardy júzege asyrý barysymen tanysty.
Aqkól aýdanyndaǵy balalardy qoldaý ortalyǵynda elimizde alǵash ret «Fosterlik otbasylar» kásibı bala asyrap alý otbasylaryn qurý jónindegi pılottyq joba iske qosylǵan.
«Bul – óte mańyzdy joba jáne ony sapaly iske asyrý úshin barlyq kúsh-jigerimizdi jumsaýymyz qajet. Bizdiń mindetimiz – balalardy áleýmettendirý. Ata-anasynyń qamqorlyǵynsyz qalǵan balalar, otbasynda turyp tárbıelenýi tıis. Oqý-aǵartý mınıstrligi tarapynan da, normatıvtik bazalar boıynsha da qoldaý kórsetiledi», - dep atap ótti vıtse-premer Altaı Kólginov.
Sondaı-aq, Premer-Mınıstrdiń orynbasary «Aýyldyq densaýlyq saqtaýdy jańǵyrtý» jobasy aıasynda Aqkól aýdandyq aýrýhanasyna bardy. Ǵımarat kúrdeli jóndeý men jańǵyrtýdy qajet etedi.
Aqmola oblysynda ulttyq joba aıasynda medıtsınalyq-sanıtarııalyq alǵashqy kómek kórsetýdiń 38 nysany salynady, birqatar aýdanaralyq aýrýhanada kúrdeli jóndeý men jańǵyrtý jumystary júrgiziledi. Sonymen qatar, medıtsınalyq kómekke qoljetimdilikti arttyrý maqsatynda Kókshetaý qalasynda 630 orynǵa arnalǵan kópbeıindi oblystyq aýrýhana salynady.
Jalpy, 2023-2025 jyldary el óńirlerinde jáne shalǵaı aýyldarda medıtsınalyq-sanıtarııalyq alǵashqy kómek kórsetýdiń 650 nysany salynady. Bıyl 300-den astam nysannyń qurylysy bastalady, sondaı-aq 30-dan astam ortalyq aýdandyq aýrýhanada kúrdeli jóndeý jáne rekonstrýktsııalaý jumystary júrgiziledi. Bul sharalar «altyn saǵat» qaǵıdaty boıynsha jergilikti jerlerde medıtsınalyq kómek alýǵa múmkindik beredi.
Kókshetaý qalasynda Altaı Kólginov «Eurasia Group Kazakhstan» JShS bazasynda dýaldy oqytý baǵdarlamasyn júzege asyrý barysymen tanysty. Agrotehnıkalyq kolledj stýdentteri ózara yntymaqtastyq jónindegi memorandým aıasynda kásiporynda kásibı tájirıbeden ótip, odan ári jumysqa ornalasady. Aqmola oblysy ákimdiginiń aqparaty boıynsha dýaldy oqytý nysany 28 kolledjde qoldanylady, atalǵan tehnologııamen 4 myńnan astam stýdent bilim alyp júr.
Sondaı-aq, Altaı Kólginov sút ónimderin shyǵaratyn «Gormolzavod» JShS-da bolyp, jobanyń alǵashqy qatysýshylarymen kezdesti. Baǵdarlama aıasynda kásiporyn shıkizatty jobaǵa qatysýshylardan satyp alady.
Aqmola oblysynyń ákimi Ermek Marjyqpaev atap ótkendeı, 2023 jyly baǵdarlamaǵa qatysýshylardy nesıeleý úshin memleket tarapynan Aqmola oblysyna 1,2 mlrd teńge bólindi, osy qarajat aıasynda aýyldyq eldi mekenderde jáne shaǵyn qalalarda jańa bıznes-jobalardy ashýǵa jáne qoldanystaǵy jobalardy keńeıtýge shamamen 250 nesıe berý josparlanyp otyr.
Altaı Kólginov Memleket basshysynyń tapsyrmasy boıynsha aýyl turǵyndarynyń tabysyn arttyrý jónindegi joba 2023 jyldan bastap óńirlerdiń erekshelikteri men áleýmettik-ekonomıkalyq damýyn eskere otyryp, barsha el tóńireginde keńeıtiletinin atap ótti. Osy maqsatta respýblıkalyq bıýdjetten 50 mlrd teńgeden astam qarjy bólindi.
Sondaı-aq, oblysta «Jaıly mektep» ulttyq jobasy aıasynda 2023-2025 jyldary 26 500 oqýshyǵa arnalǵan 20 mektep salý kózdelgen.
Sapar barysynda Úkimet basshysynyń orynbasary Soltústik Qazaqstan, Pavlodar, Qostanaı oblystary ákimderi orynbasarlarynyń, densaýlyq saqtaý, eńbek jáne áleýmettik qorǵaý, oqý-aǵartý, aýyl sharýashylyǵy, mádenıet jáne sport, ulttyq ekonomıka vıtse-mınıstrleriniń qatysýymen keńes ótkizdi. Onda áleýmettik memlekettik baǵdarlamalardy sapaly júzege asyrý boıynsha birqatar tapsyrmalar berildi.
Foto: Aqmola oblysynyń ákimdigi
