Aqmola oblysynda 500-den astam dáriger ústemeaqy aldy
KÓKShETAÝ. QazAqparat – Aqmola oblysynda 529 dáriger ústemeaqy aldy. Táýekeldiń birinshi tobyna oblystyq týberkýlezge qarsy dıspanserdiń 44 qyzmetkeri endi, dep habarlaıdy QazAqparat tilshisi oblystyq densaýlyq saqtaý basqamasyna silteme jasap.
Vedomstvonyń málimetinshe, densaýlyq saqtaý basqarmasy qyzmetkerlerdiń naýryz aıynda jumys ýaqytynyń esepteý tabeli jáne hattama boıynsha naqty atqarǵan ýaqyty úshin ústemeaqynyń mólsherin shyǵardy. Táýekeldiń birinshi tobyna COVID-19 pandemııasymen eki aptadan astam ýaqyt kúresip jatqan Aqmola oblystyq týberkýlezge qarsy dıspanserdiń 44 qyzmetkeri endi.
Oblystaǵy 10 medıtsınalyq mekeme provızorly statsıonar bolyp jasaqtaldy. Ondaǵy 237 qyzmetker ekinshi sanat boıynsha ústemeaqy alady. Al, karantındik kerýet qoıylǵan 8 medıtsınalyq uıymdaǵy qyzmetkerler úshinshi topqa enip otyr.
Aqmola oblystyq týberkýlezge qarsy dıspanseriniń juqpaly aýrýlar bólimshesiniń meńgerýshisi Marına Osıpova 2020 jyldyń 14-shi naýryzynan bastap koronavırýs ınfektsııasyn juqtyrǵan naýqastardy emdeýde.
«Búgin Memleket basshysynyń tapsyrmasymen bekitilgen 500 myń teńge shamasynda ústemeaqy aldym. Budan bólek, oblys basshylyǵy tarapynan 150 myń teńge somasynda syıaqy berildi. Áriptesterimizdiń kóbi bir aıǵa jýyq ýaqyt jaqyn týystaryn kórmese de, ózderiniń kásibı qyzmetin basty mindet sanap otyr», - deıdi Marına Osıpova.
Al, provızorlyq stantsıonardyń sanıtary Gúmıra Temirǵalıeva bolsa, 300 myń teńgeden astam ústemeaqynyń esepshotyna aýdarylǵany týraly sms habarlama alǵanyn aıtyp qýanýda.
«Bizdiń eńbegimiz shynaıy baǵalanyp otyrǵanyna qýanyshtymyz. Syıaqyny eń birinshi týysqandarymnyń ıgiligi úshin jumsaımyn», -deıdi ol.
