Aqmola oblysynda 5 myńnan astam kásipkerdiń quqyǵy qorǵaldy

KÓKShETAÝ. QazAqparat - Aqmola oblysynyń prokýratýrasy bıznesti qorǵaý boıynsha tıisti tekserý sharalaryn júrgizýde, dep habarlaıdy QazAqparat tilshisi oblystyq prokýratýranyń baspasóz qyzmetine silteme jasap.

Memlekettik sáýlet-qurylys baqylaý basqarmasyn tekserý barysynda prokýrorlar nysandy paıdalanýǵa berý úshin kásipkerler ýákiletti organǵa naqty tizbesi zańdarda kózdelmegen qujattardy usynǵanyn anyqtady.

«Sońǵy 2 jyldyń ishinde ǵana bıznes sýbektilerine obektilerdi paıdalanýǵa qabyldaýdyń 1 252 aktisi qaıta qaıtaryldy. Bul osy sanattaǵy qujattardyn 70 paıyzy. Eń soraqysy, ár bas tartý kezinde jańa negizder kórsetilgen. Prokýrorlyq tekserýdiń osy jáne basqa da nátıjeleri «Atameken» kásipkerlediń quqyqtaryn qorǵaý jónindegi keńes sheńberinde qoǵamdyq talqylaýǵa shyǵaryldy»,- deıdi vedomstvodan.

Qazirgi ýaqytta ýákiletti organ jumysynyń teris tájirıbesi toqtatyldy.

Qadaǵalaý aktisi boıynsha memlekettik qyzmetke kir keltirgeni úshin MSQBB – nyń 2 bas maman tártiptik jaýapkershilikke tartyldy, basshy jáne basqa da qyzmetkerler tártiptik jaýapkershiliktiń basqa túrlerine tartyldy. Quqyq normalaryn qate túsindirýdi boldyrmaý maqsatynda oblys prokýratýrasymen zańnamaǵa túzetýler engizildi.

Mundaı jumysty Aqmola oblysy prokýratýrasy ózge salalar boıynsha da júrgizýde.

Eske sala ketsek, Aqmola oblysy prokýratýrasynyń bastamasymen kásipkerlerdiń quqyqtaryn qorǵaý boıynsha Mobıldi toptardyń jumysy uıymdastyryldy, ol kásipkerlerdiń quqyqtaryn buzýdyń árbir faktisine, onyń ishinde tekserý obektisine barý arqyly dereý áreket etedi. Mundaı toptar oblystyń ár aýdanynda jáne qalasynda qurylǵan, olardyń telefondary Aqmola oblysy prokýratýrasynyń saıtynda ornalastyrylǵan.