Aqmola oblysynda 5 mln teńge para alǵan basqarma basshysy jeti jylǵa sottaldy

KÓKShETAÝ. QazAqparat - Aqmola oblystyq mádenıet, arhıvter men qujattamalar basqarmasynyń burynǵy basshysy R.Bıkenov pen oblystyq halyq shyǵarmashylyǵy jáne mádenı demalys ortalyǵy basshysynyń orynbasary I.Ákimovaǵa qatysty sot úkimi shyqty. Bul týraly QazAqparat tilshisi oblystyq sottyń baspasóz qyzmetine silteme jasap habarlaıdy.

«Kókshetaý qalalyq sotynyń úkimimen R.Bıkenov QR QK 28 - babynyń 3 -bóligi, 189- babynyń 3- bóligi 2,3 -bólimsheleri, 366-babynyń 3 -bóligi 3,4 -bólimsheleri boıynsha kináli dep tanylyp, 7 jylǵa bas bostandyǵynan aıyrý jazasyna kesildi. Sonymen qatar, ol ómir boıyna memlekettik qyzmette isteý quqyǵynan aıyryldy», - deıdi sottyń baspasóz qyzmetindegiler.

Vedomstvodan atap ótkendeı, budan bólek, QR QK 49- babynyń 2 -bóligi boıynsha R.Bıkenov QR «Qurmet» ordeni memlekettik nagradasy, «Ereń eńbegi úshin» medalinen aıyrý týraly usynys jasaldy.

«Al, QR QK 189 -babynyń 3 -bóligi 2,3- bólimshesi boıynsha kináli dep tanylǵan I.Ákimova 3 161 290 teńge kóleminde aıyppul salyndy. Jáne ony ómir boıyna memlekettik qyzmette isteý quqyǵynan aıyrdy», - dep tolyqtyrdy vedomstvodan.

Sotta belgili bolǵandaı, R.Bıkenov pen I.Ákimova Aqmola oblystyq mádenıet, arhıvter men qujattamalar basqarmasynyń janyndaǵy oblystyq halyq shyǵarmashylyǵy jáne mádenı demalys ortalyǵyna 3 161 290 teńge zalal keltirgen.

Eske sala keteıik, ótken jyldyń qazan aıynda Aqmola oblysynyń mádenıet, arhıvter men qujattamalar basqarmasynyń burynǵy basshysy R.Bıkenov 5 mıllıon 700 myń teńge para aldy degen kúdikpen ustalǵan bolatyn.

Sot úkimi kúshine engen joq.