Aqmola oblysynda 5 qańtarǵa deıin qosymsha shekteý engizilmeıdi
KÓKShETAÝ. QazAqparat - Bıylǵy jylǵy jeltoqsannyń 25-i men keler jyldyń 5-shi qańtary aralyǵynda Aqmola oblysynda qosymsha shekteý sharalary engizilmeıdi. Bul týraly óńirdiń bas memlekettik sanıtarlyq dárigeriniń qoldanystaǵy qaýlysynda kórsetilgen, dep habarlaıdy QazAqparat tilshisi.
Bul týraly brıfıngide Aqmola oblystyq sanıtarlyq-epıdemıologııalyq baqylaý departamenti basshysynyń orynbasary Serik Omarhanov atap ótti.
«Vedomstvoaralyq komıssııada 25 jeltoqsannan 5 qańtarǵa deıin merekelik is-sharalardy, onyń ishinde jańa jyldyq keshterdi ótkizýge shekteý qoıý týraly sheshim shyǵarylǵan bolatyn. Búgingi tańda Aqmola oblysynda bul tyıym óńirdiń bas sanıtarlyq dárigeriniń 23 qarashadaǵy №224 qaýlysymen bekitilgen», - dep atap ótti Serik Omarhanov.
Onyń aıtýynsha, mereke kúnderi monıtorıng toptary belsendi jumys isteıdi. Qoǵamdyq tamaqtaný nysandary tarapynan erteńgilik pen korporatıv ótkizý kezinde sanıtarlyq talaptyń buzylǵandyǵy anyqtalǵan jaǵdaıda, onda senbi jáne jeksenbi kúnderi olardy jabý týraly másele kóteriledi.
Sonymen qatar, Aıaz Ata men Aqshaqardy úıge shaqyrýǵa tyıym salynbaǵany aıtyldy.
Jalpy, pandemııa bastalǵannan beri Aqmola oblysynda koronavırýs ınfektsııasyn juqtyrý boıynsha 6 803 jaǵdaı tirkeldi. Onyń 91 paıyzy eresekter, 9 paıyzy 14 jasqa deıingi balalar.
«Búgingi kúnge deıin 5 813 adam saýyǵyp shyqty. 94 adam qaıtys boldy. 380 naýqas statsıonarda emdelýde», - dedi S.Omarhanov.
Jeltoqsannyń 16-23 kúnderi aralyǵynda óńirde 404 adamnyń koronavırýs ınfektsııasyn juqtyrǵany tirkeldi. Bul kórsetkish aldyńǵy aptamen salystyrǵanda 1,2 paıyzǵa az.
