Aqmola oblysynda 495 orta mektep jańa modıfıkatsııa kabınetterimen jabdyqtalǵan
KÓKShETAÝ. QazAqparat – Aqmola oblysynda bilim berýdiń zamanaýı úrdisterin eskere otyryp, mektepterdiń oqý-materıaldyq bazasyn jańartýǵa erekshe kóńil bólinip keledi. Qazir kóptegen oqý oryndary, sonyń ishinde aýyl mektepteri bilim deńgeıin álemdik standarttarǵa jaqyndatýǵa múmkindik beretin zamanaýı jabdyqtarmen qamtamasyz etilýde, dep habarlaıdy QazAqparat tilshisi oblystyq ishki saıasat basqarmasyna silteme jasap.
Oblystyq bilim basqarmasynyń basshysy Beıbit Júsipovtiń aıtýynsha, oblys mektepterin jańa modıfıkatsııa kabınetterimen jabdyqtaý 2005 jyldan beri júzege asyrylyp keledi.
«Búginde 495 orta jáne negizgi mekteptiń 396-sy jańa modıfıkatsııa kabınetterimen jabdyqtalǵan. Bul shamamen 1094 kabınet, onyń ishinde fızıka – 276, hımııa – 220, bıologııa – 230, JMK jáne STEM – 368. Jabdyqty jetkizýdi AQSh, Anglııa, Germanııa, Italııa, Ońtústik Koreıa, Polsha, Chehııa, Reseı, Qazaqstan, Qytaı, Ispanııa jáne basqa elderdiń óndirýshilerimen yntymaqtasqan qazaqstandyq iri fırmalar júzege asyrady», - dedi vedomstvo basshysy.
Oqý kabınetteriniń jıyntyǵyna aqmolalyq muǵalimderge oqý protsesin qyzyqty ótkizýge múmkindik beretin arnaıy jıhaz, demonstratsııalyq jáne zerthanalyq aspaptar, qqytýdyń tehnıkalyq quraldary, mýltımedııalyq baǵdarlamalar, ınteraktıvti jabdyqtar kiredi.
Ótken jyly ınteraktıvti kabınetter sany taǵy 105-ke artty. Onyń 72-si oblys ortalyǵynda ornatylǵan. Bular hımııa, geografııa, ınformatıka, tarıh, orys tili, aǵylshyn tili, matematıka, sondaı-aq 3D modeldeý, robototehnıka, alǵashqy ásker daıyndyq, tehnologııa (uldar men qyzdarǵa arnalǵan), bastaýysh synyptar, sport zaldary jáne ınklıýzıvti synyptar.
Aıta keteıik, bıyl óńirde 58 fızıka, hımııa, bıologııa jáne STEM kabınetterin ornatý jumystary júrgizilýde. Nátıjesinde jańa modıfıkatsııalanǵan jabdyqtarmen qamtylǵan pándik kabınetterdiń úlesi 83 paıyzdy quraıdy.
