Aqmola oblysynda 4908 adam tumaý juqtyrǵan
KÓKShETAÝ. QazAqparat - Aqmola oblysynda 4908 adamnyń tumaý juqtyrǵany tirkeldi, dep habarlaıdy QazAqparat tilshisi Aqmola oblysy boıynsha taýarlar men kórsetiletin qyzmetterdiń sapasy men qaýipsizdigin baqylaý departamentine silteme jasap.
«Aqmola oblysynda 4908 adamnyń tumaý (jedel respıratorlyq-vırýstyq ınfektsııalary) juqtyrý oqıǵasy tirkeldi. Bul kórsetkish byltyrǵy jyldyń sáıkes kezeńimen salystyrǵanda 1,9 esege azaıyp otyr. Tumaýmen aýyrǵandardyń 3462-i jaǵdaıy 14 jasqa deıingi balalardyń úlesinde, 580-i 1 jasqa tolmaǵan náresteler, 144-i júkti áıelder», - dedi vedomstvodan.
Departament mamandary atap ótkendeı, óńirde 14 adam tumaýdyń «V» túrin juqtyrǵany anyqtaldy. Onyń 5-i Kókshetaý qalasynda, 8-i Stepnogorsk qalasynda jáne 1-i Býrabaı aýdanynda tirkeldi.
Aıta keteıik, ótken jyldyń 1 qazanynan bastap oblys aýmaǵynda tumaýǵa qarsy ekpe egý naýqany bastalǵan bolatyn. Oblys boıynsha ekpe egetin 364 em-shara kabıneti anyqtalyp, «qaýiptiler» tobyndaǵy tulǵalarǵa ekpe egý úshin tegin 72 860 vaktsına qarastyrylǵan edi. Osy baǵytta jergilikti bıýdjet esebinen 7 mıllıon 830 myń teńgege 9 myń «Grıppol plıýs» vaktsınasy satyp alyndy. Dárigerlerdiń sózinshe, tumaýǵa qarsy tegin ekpeni birinshi kezekte medıtsına qyzmetkerleri, 2-3 aılyq júkti áıelder, sozylmaly aýrýlarymen dıspanserlik esepte turǵan eresekter men balalar, jıi aýyratyn 6 jastan asqan balalar, jabyq mekemelerdegi adamdar aldy.
