Aqmola oblysynda 49 mektep qashyqtan oqytýǵa aýystyryldy

KÓKShETAÝ. QazAqparat - Aqmola oblysyndaǵy koronavırýs ınfektsııasynyń tirkelýine baılanysty 49 mektep karantınge jabylyp, qashyqtan oqytýǵa kóshti. Bul týraly Aqmola oblysynyń bas memlekettik sanıtarlyq dárigeri Aınagúl Mýsına brıfıngide aıtty, dep habarlaıdy QazAqparat tilshisi.

«Oqýshylar arasynda koronavırýs juqtyrǵandardyń sany artyp keledi. Sol sebepti biz mektep oqýshylary, tehpersonal, jalpy bilim beretin mektep muǵalimderi arasynda aýrýdyń eń bolmaǵanda bir jaǵdaıyn tirkeý kezinde biz tizbekti buzý jáne oqýshylar arasynda jappaı aýrýdyń aldyn alý úshin mekemeni eki aptaǵa qashyqtyqtan oqytý nysanyna aýystyrýdy sheship otyrmyz», - dep túsindirdi bas sanıtarlyq dáriger.

A.Mýsınanyń aıtýynsha, pandemııa bastalǵannan beri mektep oqýshylary arasynda barlyǵy 548 COVID-19 jaǵdaıy tirkelgen, onyń ishinde 205-i shtattyq rejımde oqıtyn oqýshylar arasynda jáne 343-i qashyqtan oqıtyndar arasynda. Úshinshi toqsannyń basynan bastap 296 jaǵdaı, al táýligine 14 jaǵdaı tirkeldi.

«Búgingi tańda oblys boıynsha 49 mektep karantınge alynyp, qashyqtan oqytýǵa aýystyryldy. Onyń 12-i Kókshetaý qalasynda, 5-i Esil jáne Sandyqtaý aýdandarynda, 4-i Birjan sal jáne Zerendi aýdandarynda, 3-i Býrabaı, Jaqsy, Jarqaıyń, 2-i Astrahan, Atbasar, Bulandy aýdandarynda. Al, Aqkól jáne Tselınograd aýdandarynda bir-birden», - dep atap ótti A.Mýsına.