Aqmola oblysynda 440 shaqyrym joldy jóndeý jáne qaıta jańartý josparlanyp otyr

Bul týraly aımaq basshysy Ermek Marjyqpaev «2019 jylǵy áleýmettik–ekonomıkalyq damý qorytyndysy jáne 2020 jyldyń negizgi mindetteri týraly» halyq aldyndaǵy esep berý kezdesýinde aıtty, dep habarlaıdy QazAqparat.

Aımaq basshysy atap ótkendeı, óńirde kólik kommýnıkatsııalarynyń tıisti deńgeıde bolýy úshin maqsatty jumystar júrgizilýde. Bul mindetterdi sheshýge jergilikti bılikke arnaıy tapsyrma berilgen.

Ótken jyly oblysta jol-kólik júıesin jaqsartý boıynsha birshama jumys atqaryldy. Barlyǵy 400 shaqyrymnan astam jergilikti mańyzy bar joldar men kóshe-kólik jelileri jańartyldy, onyń 190 shaqyrymy aýyldyq jerlerde.

Aımaq basshysynyń aıtýynsha, bıylǵy jyly da osy baǵyt boıynsha naqty mindetter belgilengen. Oblystyq mańyzy bar 440 shaqyrym joldy jóndeý jáne qaıta jańartý josparlanyp otyr.

Bıyl Kókshetaýǵa baratyn joldy qaıta jańartý aıaqtalady jáne Elordaǵa qatynaıtyn ońtústik-batys aınalma joldyń qurylysy jalǵasady.

«Úsh jyl kóleminde barlyq aýdan ortalyqtaryndaǵy joldardy jóndeýdi josparlap otyrmyz. Osy jyly 6 aýdan ortalyǵyndaǵy joldar jóndeledi. Sonymen qatar, oblystyń barlyq óńirlerindegi kentishilik joldaryn jóndeıtin bolamyz», - dep atap ótti Ermek Marjyqpaev.

Bıylǵy jyly Krasnoıar kentiniń damýyna kóńil bólindi. «Aýyl – El besigi» baǵdarlamasy aıasynda 30 shaqyrymnan astam kóshe joldary, onyń ishinde 25 kóshe jáne «Nurly kósh» turǵyn úı alabynyń joldary jóndeledi.

Oblys ortalyǵynda Qazaqstan men Reseıdiń aımaqaralyq yntymaqtastyq forýmyna daıyndyq jumystary júrgizilýde. Bul - Qopa kóliniń jaǵasyndaǵy jol men kópirdiń qurylysy, Nazarbaev dańǵyly men Júnisov kóshesi, Nazarbaev dańǵyly men Abaı kóshesi qıylysyndaǵy joldy qaıta jańartý, «Vasılkovka» jáne «Tsentralnyı» shaǵyn aýdandary arasyndaǵy joldy ortasha jóndeý.

Jalpy, jergilikti mańyzy bar avtomobıl joldarynyń uzyndyǵy 5626 shaqyrymdy quraıdy. Onyń 2661 shaqyrymy oblystyq, 2965 shaqyrymy aýdandyq mańyzdaǵy joldar.