Aqmola oblysynda 43 sheneýnik sybaılas jemqorlyq úshin qylmystyq jaýapqa tartyldy
Departament basshysynyń málimetinshe, jaýapqa tartylǵan 43 adamnyń 5-i oblystyq deńgeıdegi, 5-i qalalyq jáne 6-y aýdandyq deńgeıdegi basshylar. Esepti kezeńde óńirdiń Sybaılas jemqorlyqqa qarsy qyzmeti 59 qylmystyq isti tirkedi, onyń ishinde 42-i aýyr jáne asa aýyr qylmystar. Qylmystyń kóp bóligi urlyq pen alaıaqtyq, sondaı-aq paraqorlyqpen baılanysty. Sonymen birge, 21 adamǵa qatysty 36 is sotqa joldandy.
Oblystyń Antıkory júıeli sybaılas jemqorlyqtyń 6 oqıǵasyn anyqtady, onda 14 qylmys anyqtalyp, oǵan 17 adam tartylǵan. Memlekettik organdardyń laýazymdy tulǵalary tarapynan ShOB qyzmetine zańsyz aralasýdyń 8 faktisi, laýazymdy tulǵalardyń «kóleńkeli» ekonomıka sýbektilerine qamqorlyǵynyń 3 faktisi anyqtaldy. Memlekettik baǵdarlamalardy iske asyrýdy súıemeldeý aıasynda 14 qylmys tirkeldi.
Esepti kezeńniń qorytyndysy boıynsha 1 mlrd teńgeden astam somaǵa zalaldy óteý qamtamasyz etildi.
«Jalpy, ótken jylmen salystyrǵanda sybaılas jemqorlyq quqyq buzýshylyqtary tómendeýiniń oń dınamıkasyn atap ótkim keledi, bul úrdis tek óńirde ǵana emes, respýblıka boıynsha da baıqalady. Bul memlekettik basqarý ókilderiniń de, sondaı-aq nemquraıly emes azamattardyń da sybaılas jemqorlyqtyń aldyn alý aıasyndaǵy jumysynyń nátıjesi», - dedi spıker.
Tikeleı efırde ótken brıfıng barysynda Arman Rahımov memlekettik organdardyń QR QPK 200-babynyń tártibinde usynýlar engizý arqyly sybaılas jemqorlyq quqyq buzýshylyqtardyń qaıtalanǵan jaǵdaılaryna jol bermeý sharalary týraly habardar etti.
Atap aıtqanda, bıylǵy jyldyń 10 aıynda oblystyń Sybaılas jemqorlyqqa qarsy qyzmeti 49 usyný engizdi. Memlekettik qyzmetkerler men túrli uıymdar qyzmetkerleriniń qatysýymen 28 kezdesý ótkizildi. Júrgizilgen jumys nátıjeleri boıynsha 41 laýazymdy tulǵa, onyń ishinde 23 basshy tártiptik jaýapkershilikke tartyldy. 7 laýazymdy tulǵa jumysynan shyǵaryldy men atqaratyn qyzmetinen bosatyldy. Jartysynan kóbi sógis pen eskertý aldy, 11 adamǵa qyzmetke tolyq sáıkes emestigi týraly eskertildi.
Departament basshysynyń aıtýynsha, aǵymdaǵy jyldyń basynan beri sybaılas jemqorlyq faktileri týraly habarlaǵan 8 aqmolalyq 980 myń teńge aldy.
«Osy turǵyda, azamattardy belsendi azamattyq ustanym tanytýǵa jáne sybaılas jemqorlyqtyń árbir belgili faktisi týraly Agenttiktiń 1424 Call-ortalyǵyna nemese óńirlik Sybaılas jemqorlyqqa qarsy qyzmetke habarlaýǵa shaqyramyn. Departament óz tarapynan árbir jaǵdaı boıynsha tıisti sharalar qabyldanatynyna sendiredi», - dep túıindedi Arman Rahımov.
