Aqmola oblysynda 40 jetim bala memlekettik turǵyn úı qory esebinen baspanaly boldy
KÓKShETAÝ. QazAqparat - Aqmola oblysynda 40 jetim bala memlekettik turǵyn úı qory esebinen baspanaly boldy. Bul týraly búgin oblystyq máslıhattyń kezekti 5-shi sessııada depýtattar aldynda esep bergen aımaq basshysy S.Kýlagın atap ótti.
Oblys ákiminiń aıtýyna qaraǵanda, turǵyn úı qurylysyna tartylǵan ınvestıtsııa kólemi 21 mıllıard teńgeni qurap otyr.
«Baspana salýda jyldyq jospar aǵymdaǵy jyldyń segiz aıynda 22 paıyzǵa asyra oryndaldy. Osy kúni Kókshetaý qalasynda Ulttyq qordyń qarajaty esebinen nesıege beriletin 5 turǵyn úıdiń qurylysy júrgizilýde. Aǵymdaǵy jyly 524 otbasy jaldamaly páter, 165 otbasy nesıege páter alatyn bolady. Injenerlik ınfraqurylymdardy tartý úshin 260 mıllıon teńgeden astam qarjy bólindi. Ásirese, jetim balalardy baspanamen qamtamasyz etýge erekshe kóńil bólinýde. Qazirgi kezde, oblystyń alty aýdanynda turatyn 40 jetim bala memlekettik turǵyn úı qory esebinen baspanaly boldy», - dep atap ótti S.Kýlagın.
