Aqmola oblysynda 40-tan astam ózbekstandyq jolaýshy qutqaryldy
KÓKShETAÝ. QazAqparat - Aqmola oblysynda jolda qalǵan avtobýstaǵy 43 adam qutqaryldy, dep habarlaıdy QazAqparat tilshisi aýmaqtyq TJD baspasóz qyzmetine silteme jasap.
Vedomstvonyń málimetinshe, aqpannyń 7-de saǵat 00:30-da aýa raıynyń nasharlaýyna (qatty aıaz) jáne «Kókshetaý - Şýchınsk - Astana» avtojolynda qozǵalystyń toqtaýyna baılanysty «Petropavl-Saryaǵash» baǵytynda kele jatqan «Setra» avtobýsy toqtatyldy. Kólik ishinde Ózbekstan Respýblıkasynyń 41 azamaty men eki qazaqstandyq júrgizýshi bolǵan.
«Kókshetaý qalalyq TJB, jergilikti atqarýshy organdar men jergilikti polıtsııa qyzmetkerleri atalmysh avtobýsty jolaýshylarymen birge qaýpisiz jerge jetkizdi. Olar Kókshetaý qalasyndaǵy Saın kóshesi, 28/1 mekenjaıynda ornalasqan áleýmettik beıimdeý ortalyǵyna ornalastyryldy. Jolaýshylardyń jaǵdaıy qanaǵattanarlyq, medıtsınalyq kómekke muqtaj emes. Qutqarý jumystaryna Aqmola oblysy TJD jáne jergilikti atqarýshy organdardyń jeke quramynan bir tehnıka jáne 2 adam tartyldy» dep kórsetilgen TJD baspasóz habarlamasynda.
Eske sala ketsek, 5 aqpanda «Astana-Petropavl» tas jolynyń 164 shaqyrymynda, ıaǵnı, Qaratal jáne Qoǵam aýyly arasynda «Saryaǵash-Ekaterınbýrg» baǵytyndaǵy avtobýs jolda qalyp, odan Ózbekstan Respýblıkasynyń 43 azamaty qutqarylǵan bolatyn.
