Aqmola oblysynda 36 adam telefon alaıaqtarynyń qurbany bolǵan
KÓKShETAÝ. QazAqparat - Aqmola oblysynda 36 adam telefon alaıaqtarynyń qurbany bolǵany týraly polıtsııaǵa shaǵymdanǵan, dep habaralaıdy QazAqparat tilshisi oblystyq PD baspasóz qyzmetine silteme jasap.
Vedomstvonyń deregi boıynsha, aǵymdaǵy jyldyń qańtarynda Býrabaı aýdandyq PB 1942 jylǵy zeınetkerden aryz túsken. Aryzdanýshynyń sózinshe, ózin polıtsııa qyzmetkerimin dep tanystyrǵan belgisiz er adam habarlasyp, nemeresin qamaýdan bosatý úshin aqsha talap etken.
«Quqyq qorǵaý organdarynyń atyn jamylǵan kúdiktini ustaýǵa arnaıy top qurylyp, oǵan jedel jáne tergeý tobynyń ǵana emes, ishki qaýipsizdik bólimsheleriniń qyzmetkerleri de tartyldy.
Jedel izdestirý sharalary barysynda polıtsııa qyzmetkerleri Qostanaı oblysynyń turǵynyn ustady», dep málim etti Aqmola oblystyq PD baspasóz qyzmetindegiler.
Kúdikti habarlasqannan soń ózin polıtsııa qyzmetkeri retinde tanystyryp, jaqynyn bosatý úshin 70 000 teńgeden 100 000 teńgege deıin aqsha talap etken.
Qazirgi kezde ol ustalyp, osyndaı ózge alaıaqtyq qylmysqa qatysy bar-joǵy anyqtalý ústinde.
Jalpy, óńirde osyndaı alaıaqtyq qylmystyń qurbany bolǵan 36 adam polıtsııaǵa aryzdanǵan.
Barlyq oqıǵa boıynsha QR QK 190 baby (alaıaqtyq) boıynsha qylmystyq is qozǵaldy.
