Aqmola oblysynda 311 mektep oqý jylyn shtattyq rejımde bastaıdy
KÓKShETAÝ. QazAqparat - Aqmola oblysynyń shalǵaı aýyldaryndaǵy 18 myń oqýshysy bar 311 mektep oqý jylyn sanıtarlyq talaptardy saqtaı otyryp shtattyq rejımde bastaıdy. Bul týraly ákimdik otyrysynda oblystyq bilim berý basqarmasynyń basshysy Beıbit Júsipov aıtty, dep habarlaıdy QazAqparat tilshisi oblys ákimdiginiń baspasóz qyzmetine silteme jasap.
«Oblystaǵy shalǵaı aýyldaryndaǵy barlyǵy 18 myń oqýshysy bar 311 mektep oqý jylyn sanıtarlyq talaptardy saqtaı otyryp shtattyq rejımde bastaıdy. Al 243 mekteptegi 115 myńǵa jýyq oqýshy qashyqtan oqytylady. Sonymen birge, 3 myńnan astam bastaýysh synyptarda ata-analardyń ótinishi boıynsha 15 oqýshydan aspaıtyn kezekshi synyptar jumys isteıtin bolady», - deıdi oblystyq bilim berý basqarmasynyń basshysy Beıbit Júsipov.
Basqarma basshysy atap ótkendeı, oblystyń barlyq jalpy bilim beretin mektepteri joǵary jyldamdyqty ınternetke qosylǵan. Oblys mektepterinde barlyǵy 16 myńnan astam kompıýter bar bolsa, búgingi kúni onyń sany 1,6 myń kompıýtermen tolyǵyp otyr. 1 qyrkúıekke deıin jergilikti bıýdjet esebinen taǵy 235 kompıýter satyp alý josparlanǵan. Sondaı-aq, Úkimet rezerviniń qarajaty esebinen 23 myńnan astam kompıýter satyp alynatyn bolady. Birinshi kezekte osal sanattaǵy balalardy kompıýtermen qamtamasyz etiledi.
Sonymen qatar, óńirde balabaqshalardyń jumysy da kezeń-kezeńmen qaıta jandanyp keledi. 159 mektepke deıingi uıymda 411 kezekshi top ashylǵan.
