Aqmola oblysynda 3000 bıýdjet ashyq bıýdjetterdiń kartasynda ornalastyryldy
«Bıýdjettiń ashyqtyǵy men sybaılas jemqorlyqtyń aldyn alýdyń biregeı tájirıbesin usynatyn Ashyq bıýdjetterdiń ınteraktıvti kartasy arqyly árbir turǵyn naqty ýaqyt rejıminde áleýmettik obektilerdi salýǵa, jóndeýge jáne kútip-ustaýǵa bólingen bıýdjet qarajatyn baqylaı alady. Bul úshin Publicbudget.kz portalynda qajetti aımaqty tańdap, mektepter, balabaqshalar, aýrýhanalar, emhanalar, joldar jáne basqa da bıýdjetterdi kórýge bolady», - dedi oblystyq sybaılas jemqorlyqqa qarsy is-qımyl departamentiniń baspasóz qyzmeti.
Jalpyǵa qoljetimdi servıste azamattar óz pikirin qaldyra alady nemese naqty derekterdiń qujattamamen sáıkessizdigi anyqtalǵan jaǵdaıda, tıisti foto - jáne beınematerıaldardy qosa bere otyryp, ýákiletti organǵa ótinish bere alady.
Qazirgi ýaqytta Aqmola oblysy boıynsha Sybaılas jemqorlyqqa qarsy is-qımyl departamenti jergilikti atqarýshy organdarmen birlesip, jalpy somasy 430 mıllıard teńgege jýyq túrli qyzmet salasyndaǵy uıymdardyń shamamen 3000 bıýdjetin ornalastyrýdy qamtamasyz etti.
Interaktıvti karta negizinde ótken jyldan bastap bıýdjetti qalyptastyrý men jumsaýǵa azamattardyń habardarlyǵyn arttyrý arqyly memlekettik basqarýǵa azamattyq qatysýǵa járdemdesýge baǵyttalǵan «Ashyq bıýdjet» jobasy iske asyrylýda.
Joba aıasynda «Aqmola – adaldyq alańy» jobalyq keńsesiniń qyzmetkerleri Publicbudget.kz portaly arqyly bıýdjet qarajatyn tıimdi jáne maqsatty paıdalanýǵa monıtorıng júrgizýde. Monıtorıngtiń arqasynda 9,7 mıllıonnan astam teńgege únemdeldi.
Sondaı-aq, oblystyq departamenttiń janynda «Ashyq bıýdjet» óńirlik klýby jumys isteıdi, onyń maqsaty azamattardyń qarjylyq saýatyn arttyrý úshin olarǵa keńes berý. Klýb quramyna qoǵam ókilderi, máslıhat depýtattary, qarjy, ekonomıka jáne salyq salasynyń mamandary kirdi. Búgingi tańda «Ashyq bıýdjet» jumysy aıasynda áleýmettik jelilerde 35-ten astam tikeleı efır ótkizildi.