Aqmola oblysynda 30 kópbalaly otbasyna gaz plıtasy syıǵa tartyldy
KÓKShETAÝ. QazAqparat - Halyqaralyq áıelder kúni qarsańynda Aqmola oblysynda 30 kópbalaly otbasyna gaz plıtalaryn satyp alý úshin sertıfıkat berildi, dep habarlaıdy QazAqparat tilshisi «Nur Otan» partııasynyń Aqmola oblystyq fılıalynyń baspasóz qyzmetine silteme jasap.
«Nur Otan» partııasynyń oblystyq fılıalynda «Z0 qaıyrymdy is» partııasynyń aktsııasy jáne Qazaqstan halqy Assambleıasynyń «Qaıyrymdylyq kerýeni» aktsııasy aıasynda Halyqaralyq áıelder kúni qarsańynda «Nur Otan» partııasy Aqmola oblystyq fılıaly tóraǵasynyń birinshi orynbasary Ǵalym Bekmaǵambetov pen Kókshetaý qalalyq máslıhatynyń depýtaty, «Kókshetaý mıneraldy sýlary» AQ dırektory Stanıslav Maksımets Kókshetaý qalasynyń alty jáne odan da kóp balalary bar 30 kópbalaly otbasyna as úı plıtasyn satyp alýǵa sertıfıkattar tabys etti. Partııa fılıaly tóraǵasynyń birinshi orynbasary sharaǵa qatysqan kópbalaly analardy 8 naýryz – Halyqaralyq áıelder kúnimen quttyqtady.
«Qurmetti arýlar, úılerińizden jáne júrekterińizden jylýlyq ketpesin. Kóktem merekesi sizderge jáne sizderdiń otbasylaryńyzǵa jaqsylyq ákelsin»,- dedi óz sózinde Ǵalym Bekmaǵambetov.
Óz kezeginde analarda kórsetilip jatqan kómek qoldaýǵa alǵys bildirdi.
«Kópbalaly otbasylarǵa memleket tarapynan kórsetiletin áleýmettik qoldaý sharalary úshin zor alǵysymdy bildirgim keledi. Bul ataýly áleýmettik kómek, kepildendirilgen áleýmettik paketter, memlekettik granttar men jumysqa ornalastyrý», – dedi Ásemgúl Mahambetova.
Partııa fılıalynyń málimetinshe, memlekettik saıasattyń mańyzdy basymdyqtary otbasy ınstıtýtyn, kópbalaly analardy, áıelder kásipkerligin qoldaý jáne genderlik teńgerimdi qamtamasyz etý bolyp tabylady. 2021 jylǵy 1 naýryzdaǵy jaǵdaı boıynsha Aqmola oblysynda 9476 kóp balaly otbasy turady, onyń1861 - oblys ortalyǵynda.
