Aqmola oblysynda 30-dan astam atys qarýy tárkilendi

KÓKShETAÝ. QazAqparat - Aqmola oblysynda júrgizilgen «Quqyqtyq tártip» jedel aldyn alý sharasy barysynda tártip saqshylary 30-dan astam atys qarýyn, 15 oq-dári, 4 arnaıy qural, sondaı-aq 20 sýyq qarý tárkiledi, dep habarlaıdy QazAqparat tilshisi.

Oblystyq polıtsııa departamenti baspasóz qyzmetiniń málimetinshe, bıylǵy jyldyń 18 qańtarynda Atbasar aýdandyq PB qyzmetkerleri jedel aldyn alý sharasy aıasynda úı aýlalaryn aralaý kezinde 44 jastaǵy jergilikti turǵynnan tirkelmegen 12 kalıbrli, TOZ-34r markaly eki uńǵyly myltyq tárkiledi.

Sol kúni oblystyq PD krımınaldyq polıtsııa basqarmasynyń qyzmetkerleri oblys ortalyǵy turǵynynyń kóligi men jolaýshysynan úsh metall pyshaq, metall «kastet» tapty.

Al, 17 qańtarda Býrabaı aýdanyndaǵy aýyldardyń biriniń turǵynynan tirkelmegen IJ-18E, 16 kalıbrli ańshylyq myltyq tárkilendi.

«Barlyq jaǵdaı boıynsha tekserý júrgiziledi, sonymen qatar sot-ballıstıkalyq zertteý taǵaıyndaldy. Júrgizilgen saraptama nátıjesi boıynsha sheshim qabyldanady», - dedi vedomstvodan.

Vedomstvodan atap ótkendeı, aktsııa bastalǵannan beri aqmolalyq polıtsııa qyzmetkerleri 403 qaraýsyz qalǵan ǵımarat pen 554 qaraýsyz qalǵan saıajaı massıvin tekserdi.