Aqmola oblysynda 30 áleýmettik nysanda qalypty temperatýra saqtalmaýda
KÓKShETAÝ. Qańtardyń 28-i. QazAqparat /Janmurat Janaıdarov/ - Aqmola oblysynyń memlekettik sanıtarlyq-epıdemıologııalyq qadaǵalaý basqarmasynyń derekterine sáıkes óńirdegi 14 jalpy bilim beretin mektep pen 16 densaýlyq saqtaý nysanynda qalypty temperatýra saqtalmaýyna baılanysty tıisti hattamalar toltyrylǵan,
dep habarlaıdy QazAqparat tilshisi basqarma baspasóz qyzmetine silteme jasap.
Іshinara júrgizilgen tekseris barysynda Kókshetaý men Stepnogor qalalarynda, Atbasar, Bulandy, Býrabaı, Zerendi, Jarqaıyń, Ereımentaý, Sandyqtaý aýdandarynda áleýmettik nysandardyń jylý temperatýralary sanıtarlyq talapqa saı emestigi anyqtalǵan. Bul rette Býrabaı aýdanynda «Bóbek», «Odývanchık» balalar baqshalarynda, mektep-ınternatta, «Shuǵyla» shaǵyn ortalyqta, tórtinshi mektepte, al Shortandy aýdanynda kásiptik tehnıkalyq ýchılışe, Jolymbette nómiri 1-shi jáne 2-shi orta mektepterde, Novoselskıı orta mektebinde jaǵdaı syn kótermeıdi. Sanıtarlyq qadaǵalaý mekemesi óz tarapynan hattama toltyryp, laýazym ıelerine bes aılyq eseptik kórsetkish mólsherinde aıyppul salǵan.
