Aqmola oblysynda 3 myńnan astam qylmystyq is elektrondyq formatta tergelýde

KÓKShETAÝ. QazAqparat - Aqmola oblysynda qylmystyq isterdiń 86 paıyzy elektrondyq formatta tergelýde. Bul týraly óńirdiń úılestirý keńesiniń otyrysynda oblys prokýrory Aıdos Maılybaev málimet etti, dep habarlaıdy QazAqparat tilshisi.

Aqmola oblystyq prokýratýrasy baspasóz qyzmetiniń málimetinshe, otyrysta elektrondyq tergeý nátıjeleri men ózekti máselelerdi sheshý joldary talqylandy. Oblys prokýrory Aıdos Maılybaev qylmystyq isterdi elektrondyq formatta tolyq jáne sapaly tergeýdi qamtamasyz etý qajettigin atap ótti.

«Qazirgi ýaqytta Aqmola oblysynda 3 myńnan astam qylmystyq is nemese tirkelgen qylmystyq quqyq buzýshylyqtardyń jalpy sanynyń 86 paıyzy elektrondyq formatta tergelýde. Bul jumys prokýratýra men barlyq quqyq qorǵaý jáne arnaıy organdardyń tyǵyz ózara is-qımylynda júrgiziletin bolady», - dedi oblys prokýrory Aıdos Maılybaev.

Otyrysta aıtylǵandaı, qylmystyq sot isin júrgizýdiń elektrondyq formatyn engizýdiń maqsaty zańdylyqty, ashyqtyqty, beıtaraptyqty qamtamasyz etý, sondaı-aq qylmystyq protseste yqtımal sybaılas jemqorlyq táýekelderin boldyrmaý.

«Bul jańalyq barlyq tergeýdiń ashyqtyǵyn qamtamasyz etýge, is materıaldarynyń burmalanýyn boldyrmaýǵa múmkindik berdi jáne dáleldemelerdi jınaý jáne is júrgizý qujattaryn jasaý rásimin jeńildetti», - dep tolyqtyrdy oblys prokýrory.