Aqmola oblysynda 3 myń adamǵa jetkilikti dári-dármek qory bar

KÓKShETAÝ. QazAqparat - Aqmola oblysynda koronavırýs ınfektsııasyna shaldyqqan naýqastardy emdeý úshin qajetti dári-dármek qory jetkilikti. Bul týraly brıfıngide oblystyq densaýlyq saqtaý basqarmasy basshysynyń orynbasary Narıman Syzdyqov málim etti, dep habarlaıdy QazAqparat tilshisi.

Basqarma basshysy orynbasarynyń aıtýynsha, oblystyń medıtsınalyq uıymdarynda koronavırýs ınfektsııasyna shaldyqqan naýqastardy emdeýge arnalǵan dárilerdiń qaldyqtary bar. Bul 55 mıllıon teńge kólemindegi rıvaroksaban, apıksaban, dabıgatran, paratsetamol jáne ıbýprofen. Búginde 681 adam 10 mıllıon teńgeniń dári-dármegimen qamtamasyz etilgen», - dedi Narıman Syzdyqov.

Osy rette, ótken jyldyń qyrkúıek aıynan beri 1 800 adam 40 mıllıon teńgeniń joǵaryda atalǵan preparattarymen qamtamasyz etildi.

«Gýmanıtarlyq kómek aıasynda medıtsınalyq uıymdarǵa 6 870 orama peroraldi antıkoagýlıanttar – rıvaroksaban jáne dabıgatran taratyldy. Barlyq preparattar bastapqy medıtsınalyq – sanıtarlyq kómek kórsetý uıymdaryna taratyldy», - dedi Narıman Syzdyqov.

Sonymen birge, ol oblysta epıdemıologııalyq jaǵdaı nasharlaǵan jaǵdaıda rezervtik qor bar ekenin atap ótti. Bul - 81 mıllıon teńgeniń 13 túrli dári-dármegi.