Aqmola oblysynda 3 altyn óndiretin ken oryn ashyldy
KÓKShETAÝ. QazAqparat - Aqmola oblysynda birtop geologtar marapattaldy, dep habarlaıdy QazAqparat tilshisi.
Elimizde jyl saıyn sáýir aıynyń birinshi jeksenbisinde Geologtardyń kásibı merekesi atalyp ótiledi. Buǵan aqmolalyqtarda óz úlesterin qosýda. Bul joly saltanatty sharaǵa qatysqan Aqmola oblysy ákiminiń orynbasary Qanat Ydyrysov el ıgiligin eseleýge barynsha úles qosyp kele jatqan sala mamandaryn merekelerimen quttyqtap, ardagerler men eńbek ozattaryn marapattady.
«Sizderdiń eńbek joldaryńyz jastarǵa úlgi. Tynymsyz eńbekterińizdiń arqasynda búginde oblysymyzdyń aýmaǵynda kóptegen ken oryndary ashyldy. Bul óńirimizdiń ekonomıkalyq ósýine oń yqpal tıgizip jatqany sózsiz», - dedi Qanat Ydyrysov.
Sonymen qatar, ol ótken jyly Aqmola, Qostanaı, Soltústik Qazaqstan oblystarynda kóp taralǵan qatty paıdaly qazbalardy geologııalyq barlaý jumystaryna 7,8 mıllıard teńge qarjy ınvestıtsııalanǵanyn, 2017 jyldyń sońynda Bestóbe, Jolymbet kentteri men Aqsý aýylynda altyn óndiretin ken oryndary ashylǵanyn atap ótti.
Geologııa salasyn damytýǵa jáne elimizdiń mıneraldyq-shıkizat qoryn arttyrýǵa qosqan eleýli úlesi úshin «Sokolovka» aktsıonerlik qoǵamynyń tehnıkalyq basshysy Oryndyq Nurmaǵambetov, «Kókshetaýgıdrogeologııa» aktsıonerlik qoǵamynyń tehnık-geofızıgi Sándibek Búrkitbaev «Jer qoınaýyn barlaýdyń úzdigi», «Varvarınskoe» aktsıonerlik qoǵamynyń bas geology Dmıtrıı Kartsev «Jer qoınaýynyń qurmetti barlaýshysy» tósbelgilerimen marapattalsa, «Soltústikqazjerqoınaýy» óńiraralyq departamentiniń gıdrogeology Galına Pıatovaǵa «Eńbek ardageri» medali tabystaldy.
Sonymen qatar, birqatar sala úzdikteri Qazaqstan Respýblıkasy Investıtsııalar jáne damý mınıstrliginiń Qurmet gramotasymen, oblys ákiminiń Alǵys hatymen marapattaldy.
