Aqmola oblysynda 3 adam órtten qutqaryldy
KÓKShETAÝ. QazAqparat - Aqmola oblysynda 3 adam órtten qutqarylyp, 22 adam qaýipsiz jerge kóshirildi, dep habarlaıdy QazAqparat tilshisi oblystyq tótenshe jaǵdaılar departamentiniń baspasóz qyzmetine silteme jasap.
Vedomstvonyń málimetinshe, órt Kókshetaýdyń irgesindegi Krasnoıar kentinde tórt qabatty turǵyn úıdiń elektr qalqanynan shyqqan.
«Órt bolǵan jerge departamenttiń jeke qurmynan 15 qyzmetker jáne 4 arnaıy tehnıka jetti. Tańǵy saǵat 07:50 shamasynda tilsiz jaý aýyzdyqtalyp, 08:12 kezinde tolyq sóndirildi. Osy úıde turatyn 3 adam qutqarylyp, 22 adam qaýipsiz jerge shyǵaryldy. Zardap shekkender joq», - deıdi vedomstvodan.
Aldyn ala málimet boıynsha, qyzyl jalyn elektr symdarynyń qysqa tuıyqtalýynan tutanǵan.
