Aqmola oblysynda 3,1 mln gektar alqapqa tsıfrlandyrý júıesi engizildi
KÓKShETAÝ. QazAqparat - Aqmola oblysynda 3,1 mıllıon gektar egistik alqapqa tsıfrlandyrý júıesi engizildi. Bul týraly kóktemgi dala jumystaryna daıyndyq barysy talqylanǵan jıynda Aqmola oblysy ákiminiń orynbasary Asqarbek Úısimbaev aıtty, dep habarlaıdy QazAqparat tilshisi.
Onyń aıtýynsha, Memleket basshysynyń Qazaqstan halqyna Joldaýynda atap kórsetilgenindeı, tórtinshi ónerkásiptik revolıýtsııa jaǵdaıynda agroónerkásiptik keshendi tsıfrlandyrý jáne ony jetildirý alǵa qoıylǵan jańa mindetterdiń mańyzdy quramdas bóligi sanalady. Aýyl sharýashylyǵyn tsıfrlandyrýda barynsha mol ekonomıkalyq tıimdilikke jol ashatyn eginshiliktiń naqty nemese dáldik tutqalaryn qoldanýǵa ekpin túsiriletin bolady. Bul oraıda tsıfrlandyrýdyń jekelegen elementteri oblystyń aldyńǵy qatarly aýyl sharýashylyǵy kásiporyndarynda qazirdiń ózinde qoldanylýda. Olardyń qatarynda «Rodına» AF» JShS, «Belaǵash» JShS, «Jýravlevka 1» JShS, «Mánshúk AE» AF JShS, «Fermer 2020» JShS, «Zarechnoe» JShS, «Dıhan plıýs» AF JShS, «Jer-1» JShS, «Svobodnoe» JShS, «Vıktorovskoe» JShS jáne basqa kóptegen kásiporyndar bar.
Oblys boıynsha tuqym sebý jáne astyq jınaý jumystarynyń kólemin esepke ala otyryp, eginshiliktiń naqty júıesin qoldanýdan túsetin ekonomıkalyq tıimdilik ondaǵan mıllıard teńgeni quraýy múmkin. Eginshiliktiń dáldik júıesinde elektrondy alqap qurylymy negizge alynatyn spýtnıktik jáne kompıýterlik tehnologııa qoldanylady.
«Búgingi kúni 1389 sharýashylyq 5,7 mıllıon gektar alqaptyń 3,1 mıllıon gektaryn tsıfrlandyrý júıesine engizdi, bul búkil alqaptyń 53,5 paıyzy. Bul jumystardy barlyq jerde 1 maýsymǵa deıin aıaqtaý kerek, óıtkeni egin jınaý jumystaryna arnalǵan dızel otyny taýar óndirýshilerge bekitilgen aýyl sharýashylyǵy daqyldarynyń elektrondyq kartasyna sáıkes bólinedi. Alqaptardy tsıfrlandyrý sharýashylyqtardaǵy jaǵdaıǵa naqty baǵa berýge, aýyl sharýashylyǵy daqyldaryn óndirý tehnologııasyn ońtaılandyrýǵa, janar-jaǵarmaıdyń, tuqym men zııankesterden saqtaný quraldarynyń shyǵynyn toqtatýǵa jáne ónimdilikti arttyrýǵa múmkindik beredi», dep atap ótti A.Úısimbaev.
