Aqmola oblysynda 264 bala «Altyn belgige» úmitker
KÓKShETAÝ. QazAqparat - Bıyl Aqmola oblysynda 264 bala «Altyn belgige» úmitker. Bul týraly Aqmola oblysynyń ákimi Málik Myrzalınniń tóraǵalyǵymen ótken apparat keńesinde aıtyldy, dep habarlaıdy QazAqparat tilshisi ákimdiktiń baspasóz qyzmetine silteme jasap.
Keńeste aldaǵy Ulttyq biryńǵaı testileýge daıyndyq jáne ótkizý, mektep oqýshylarynyń jazǵy demalystaryn oıdaǵydaı uıymdastyrý, óńirlik kommýnıkatsııalar qyzmetiniń jumysy men qalyptasyp otyrǵan qazirgi jaǵdaıy týraly máseleler qaraldy.
Ulttyq biryńǵaı testileýge daıyndyq jáne ony ótkizý barysy týraly, jazǵy kanıkýl kezderi balalardyń densaýlyǵyn saýyqtyrý, olardyń demalysyn uıymdastyrý jaıly bilim basqarmasynyń basshysy Talǵat Júnisov habarlama jasady. Baıandamashynyń málimdeýinshe, oblysta 4986 mektep bitirýshi bolsa, olardyń 3649-sy Ulttyq biryńǵaı testileý tapsyrady dep kútilýde. Onyń ishinde 264 bala «Altyn belgige» jáne 126 mektep bitirýshi úzdik attestatqa úmitker. Qazaqstan Respýblıkasynyń Bilim jáne ǵylym mınıstrliginiń «2017-2018 jyldarǵy oqý jylyn aıaqtaý týraly» 2018 jyldyń 27 aqpanyndaǵy №74 buıryǵyna sáıkes, 29 mamyr men 9 maýsym aralyǵy emtıhan ótkizý merzimi bolyp belgilendi. Al, Ulttyq biryńǵaı testileý oblys boıynsha 11 ortalyqta ótedi. Onyń 8-i oblys aýmaǵynda ornalasqan, 3-ýi Astanada.
«Mektepterde sońǵy ótken aldyn ala testileý oblys boıynsha 80,3 baldyń shamasyndaǵy kórsetkishti kórsetip otyr. Al, ekinshi máselege kelsek, búgingi tańda oblysta 17 saýyqtyrý ortalyǵy qyzmet isteıdi. Ol ortalyqtarda 5687 oqýshy tabıǵat aıasynda demalmaq. Oblys boıynsha 1-10 synyptarda oqıtyn barlyǵy 111700 oqýshy bolsa, onyń 99 paıyzyn osy ortalyqtarda demaldyrý josparlanýda. Múmkindiginshe birde-bir bala nazardan tys qalyp jatqan joq. Balalardyń jazǵy demalysy kóbine mektep janyndaǵy lagerlerde uıymdastyrylýda. Mundaı lagerlerdiń sany 600-den asady. Áleýmettik jaǵynan az qamtylǵan otbasylaryndaǵy jas jetkinshekter de bul jaǵynan basty nazarda», dedi Talǵat Júnisov.
Oqýshylar úshin 5 adamdy qamtıtyn «Uly dala eli» ekspedıtsııasy uıymdastyrylady. Býrabaı aýdanynda 500 adamnyń qatysýymen respýblıkalyq týrıstik ólketaný ekspedıtsııalyq otrıadtarynyń sleti ótkiziledi. Oǵan qosa 10 myń oqýshy oblystyń kıeli jerlerine saıahat jasaıtyn bolady.
Jıyndy qorytyndylaǵan Málik Myrzalın aıtylǵan barlyq máselelerdi eskere kele, jaýapty sala basshylaryna Ulttyq biryńǵaı testileý jáne balalardyń jazǵy demalysyn oıdaǵydaı uıymdastyrý jáne ótkizý baǵytynda qolǵa alynǵan jumystarǵa asa jaýapkershilikpen qarap, ýaqtyly oryndaýdy tapsyrdy.
