Aqmola oblysynda 25 jol-kólik ınfraqurylymy jobasy qolǵa alyndy
Onyń barysynda jýrnalıster Qoıandy, Qyzyljar, Qabanbaı batyr, Araıly, Y.Altynsarın, Talapker kenti men Qosshy qalasynyń kóshe-joldarynda júrgizilip jatqan kúrdeli jóndeý jumystaryn baıqap qaıtty. Baspasóz týryna Indýstrııa jáne ınfraqurylymdyq damý mınıstrliginiń Avtomobıl joldary komıteti men ákimdikterdiń ókilderi, sondaı-aq Parlament Májilisiniń depýtattary jáne jergilikti qoǵam belsendileri qatysty.
Joǵaryda atalǵan eldi mekenniń barlyǵy elordaǵa taıaý ornalasqandyqtan olar qysqaýaqytta ulǵaıa tústi. Onyń nátıjesinde qosymsha jol ınfraqurylymyn salýdyń qajettiligi týyndady. Máselen, Qoıandy aýylyndaǵy joldardyń uzyndyǵy buryn 30 shaqyrymnan aspaıtyn. Qazir bul kórsetkish 145 shaqyrymǵa jetip otyr. Alaıda onyń tek 20 shaqyrymdaı aýmaǵyna ǵana asfaltbeton tóselgen. Atalǵan aýyldyń turǵyny Danara Qabdylsháripova ózekti máseleniń sheshilýine IIDM Avtomobıl joldary komıteti kómektesedi degen senimde.
«Kúzde, kóktemde balshyqqa batyp júretinbiz. Kólikpen de, jaıaý da óte almaısyń. Jazda shańnan kóz ashylmaıdy. Bıyl Avtomobıl joldary komıtetiniń qoldaýymen seń qozǵalyp, jóndeý jumystary qolǵa alyndy. Áleýmettik mańyzy bar nysandarǵa jol salynady degen úmitimiz basym», dedi D.Qabdylsháripova.
Qoıandydaǵy Ál-Farabı kóshesin jóndep bolǵan soń onyń uzyndyǵy 17 shaqyrymǵa jýyqtaıdy dep josparlanǵan.
«Jospar boıynsha 2023 jyldyń sońyna deıin shamamen 3 shaqyrymdaı joldy salýdy josparlap otyrmyz. Bul negizgi jol men iske qosylyp turǵan elektr jelileriniń uzyndyǵy. Kúrdeli jóndeýdiń nátıjesinde bul jol uzaqqa deıin qyzmet etedi dep oılaımyz. Sebebi qurylys barysynda shoıtas qoldanyldy. Bul joldyń beriktigin nyǵaıtady. Shoıtastyń dıametri 70-ten 1,5 metrge deıin jetedi», dedi Tselınograd aýdany jolaýshylar kóligi jáne avtomobıl joldary bóliminiń basshysy Álimbek Bektemirov.
Bul oraıda mınıstrlik halyqty qajetti kólik ınfraqurylymymen qamtamasyz etý úshin eldi mekenderdegi kóshelerdiń kúrdeli jóndeý jumystaryna erekshe basymdyq berip kele jatqanyn aıta keteıik. Máselen, jyl saıyn bul baǵytqa arnalǵan qarjylandyrý kólemi ulǵaıyp keledi. Atap aıtqanda, bıyl Aqmola oblysynyń kólik ınfraqurylymyna 18 mlrd teńge qarastyrylyp otyr. Atalǵan aqsha 25 jobany iske asyrýǵa baǵyttalǵan. Osy arqyly 22 eldi mekenniń jol máselesi sheshiledi.
«Astanaǵa irgeles eldi mekenderdiń ózekti jol ýchaskelerin jańǵyrtýdy Indýstrııa jáne ınfraqurylymdyq damý mınıstrligi udaıy qoldap keledi. Osy rette keshendi jospar bar ekenin, soǵan sáıkes 2023 jyly 18 mlrd teńge bólingenin atap ótken jón. Aqmola oblysy úshin jeke baǵdarlama ashyldy. Qazir Qyzylsýat aýylyndamyz turmyz. Osy aýylda júrgizilip jatqan jumystar bıyl aıaqtalady. Sonymen qatar munda jaryqtandyrý jumystary iske asyrylyp jatyr», dedi Avtomobıl joldary komıteti tóraǵasynyń orynbasary A.Ǵabdýllına.
Vedomstvo ókili aıtqandaı, 2023 jyly 17 joba aıaqtalmaq. Osy arqyly 14 eldi meken jol ınfraqurylymymen qamtamasyz etiledi. Qalǵanjobalar kezeń-kezeńmen iske asyrylady.
