Aqmola oblysynda 25 myń qyzmetkerdiń jalaqysy artty

KÓKShETAÝ. QazAqparat - Aqmola oblysynda 1 qańtardan bastap, áleýmettik jáne bıýdjettik salada jumys isteıtin 25 myń qyzmetkerdiń eńbekaqysy artty. Bul týraly Óńirlik kommýnıkatsııalar qyzmetinde ótken brıfıngte oblys ákiminiń orynbasary Qanat Ydyrysov aıtty, dep habarlaıdy QazAqparat tilshisi.

Brıfıngte aıtylǵandaı, Memleket basshysy Úkimettiń aldynda halyqtyń ál-aýqatyn jáne azamattardyń ómir súrý sapasyn arttyrýdy basty mindet etip qoıyp otyr.

«Bıylǵy jyldyń qańtarynan bastap, Aqmola oblysynda 25 myń áleýmettik jáne bıýdjettik sala qyzmetkeriniń eńbekaqysy artady. Osy maqsatta qosymsha 17 mıllıard teńge bólindi. Naqtyraq aıtatyn bolsaq, bıyldan bastap oblysta 15 myńnan astam pedagogtyń eńbekaqysy 25 paıyzǵa, 1600 dárigerdiń eńbekaqysy 30 paıyzǵa, 5800 orta medıtsına qyzmetkeriniń jalaqysy 20 paıyzǵa, 1400 áleýmettik jáne 1800-ge jýyq mádenıet, arhıv qyzmetkeriniń aılyq tabysy 30 paıyzǵa ósti», – dedi Qanat Ydyrysov.

Sonymen qatar, atap ótilgendeı, 2020 jyldyń qańtarynan oblysta 7514 kópbalaly otbasyna kirisine qaramastan 42 500 teńgeden 73370 teńgege deıin memlekettik járdemaqy tóleý bastalǵanyn jetkizdi.

Al Aqmola oblystyq Jumyspen qamtýdy jáne áleýmettik baǵdarlamalardy úılestirý basqarmasynyń basshysy Dına Ahmetjanova bıyl engizilgen ataýly áleýmettik kómektiń jańa formatynyń úsh baǵytyn aıtyp berdi.

«Birinshisi – tórt jáne odan da kóp balasy bar otbasylarǵa tabysyna qaramastan tólenetin memlekettik járdemaqy. Ekinshiden, ataýly áleýmettik kómek berý tetigi ózgertildi. Úshinshiden, áleýmettik az qamtylǵan otbasylardyń balalaryna áleýmettik paketter taratylady», – dedi Dına Ahmetjanova.